Nagkainit karon ang kontrobersiya nga gikalambigitan ni Capitol security chief Loy Madrigal. Kini nagsugod sa mga alegasyon sa iya kuno nga kapalpak isip hepe sa Cebu Provincial Anti-Illegal Fishing Task Force. Dayon mitumaw ang ngil-ad nga isyu sa imoralidad sa diha’ng mibutho ang mga alegasyon, ilabina gikan ni Medellin Mayor Ricky Ramirez, nga gisurikbot kuno ni Madrigal ang minyo niya nga sekretarya.
Ning bag-o, ang sakyanan nga giisyu kang Madrigal sa Kapitolyo ang nakabangga og magtiayon didto sa dakbayan sa Bogo. Patay ang lalaki nga biktima samtang nahilandig karon sa tambalanan ang iya’ng asawa.
Dugang sa problema ni Madrigal mao nga ang drayber sa iya’ng sakyanan atol sa mao’ng insidente dili diay empleyado sa kagamhanan sa probinsiya. Tungod niini, posible nga mag-atubang og misconduct investigation si Madrigal.
Kini ang hinungdan sa iya nga pagkasuspenso sulod sa 15 ka adlaw. Daan nang gipadayag ni Gobernador Hilario Davide III nga angay gayud nga mo-resign si Madrigal sa iya’ng katungdanan gumikan niini’ng kontrobersiya nga iya’ng gikalambigitan . Apan mora’g walay plano si Madrigal nga mo-resign. Gani mihirit pa siya ngadto kang Davide ug mihangyo sa gobernador nga ikonsidera unta ang panawagan niini alang kaniya ug sa iya nga sekretarya pag-resign.
Apan mao lagi, samot na hinuon nga dili lum-an si Madrigal sa mga isyu kun magpabilin siya sa iya nga katungdanan. Seryoso kini’ng kontrobersiya nga iya’ng gikalambigitan ug dili gayud kini molurang samtang anaa pa siya magpabantang sa Kapitolyo. Kun ako pay Madrigal, dili na ako mag-usik sa panahon ug mohawa na lamang ako sa katungdanan. Mas maayo nga mamutos na lamang siya ug mobiya sa Kapitolyo aron nga mas matutokan pa niya ang mga isyu batok kaniya.
Walay lain nga opsiyon si Madrigal kundili ang pag-resign. Kini aron pagluwas sa opisina nga iya nga gikuptan. Kay kun magpabilin siya sa iya’ng katungdanan, dako ang posibilidad nga dili na hinuon siya maka-concentrate sa iya’ng pagserbisyo sa katawhan.
Gikinahanglan gayud niya ang pagbiya sa katungdanan aron usab nga malikayan ni Madrigal ang tentasyon nga gamiton ang inpluwensiya sa iya’ng opisina atol sa imbestigasyon unya sa mao’ng mga isyu.
Labaw sa tanan, ang resignasyon ni Madrigal magpasabot lamang sa dako niya nga pagtahod ni Davide, kinsa maoy iya’ng agalon. Angay lamang nga dili na niya hatagan pa og dugang problema ang gobernador.