Ang ebanghelyo ni San Juan ang gilangkoban sa Signs and Glory segun sa akong nakat-onan sa Johanine Literature nga gitudlo kaniadto ni Padre Carmelo Diola. Ang Signs mao kadtong mga milagro ug pagpamuhat sa atong Ginoong Jesus diha sa iyang public ministry.
Ang Glory mao ang kahimayaan nga nasinati niya labina gyud niadtong higayon diin siya gilansang ug namatay sa Krus. Salikwaot dawaton alang sa tawhanong panlantaw apan alang natong mga Kristohanon ang iyang kamatayon sa Krus Kahimayaan ug Kadaugan.
Maingon nga ang bitin nga tumbaga giisa aron maluwas ang mga Israelita gikan sa tinong kamatayon gumikan sa pagpaak kanila sa mga Malala nga mga bitin, ang Anak sa Tawo usab kinahanglan nga iisa aron ang maong buhat magdala og kaluwasan ug kinabuhi nga namatay diha sa pagpakasala. Mahinungdanon kini nga pagtulon-an alang kanatong mga Kristohanon. Ang krus dili kaulawan kondili kinabuhi ug kaluwasan. Diha sa Krus, napadayag ang naghingapin nga gugma sa Dios alang kanatong mga tawo.
Sa atong pagsaulog ning maong pangilin, dili unta nato isalikway ang krus sa atong kinabuhi. Hinunoa, isipon ta siya nga kahigayonan aron mas mahingpit pa nato ang atong kaugalingong panaw diha sa kinabuhing espirituhanon.