Ordinansa nga dili komedya

Ambot mahimo ba kaha kini sa atong dakbayan nga dili man kaayo kita estrikto nga mopatuman sa mga ordinansa, sama sa mga traffic rules and regulations. Ang dakbayan sa Mandaluyong mipasar og ordinansa nga nagdili ug magsilot sa mga lalake nga moangkas sa motorsiklo.

Tumong sa Ordinance No. 550, mao ang paglikay ug pagsanta sa kriminalidad nga sagad buhaton sa mga nagsakay sa motorsiklo, labi na panahon sa kagabhion. Gidid-an na ang pag-backride, gawas sa mga paryente.

Exempted niining maong backriding ban ang mga babaye ug mga bata nagpanuigon gikan sa 7 ngadto 10. Kay wa man ta makadungog nga dunay mga babaye ug mga bata sakay sa motorsiklo nga nang-hold up o namusil.

Ang maong ordinansa gi-patterned sa susamang balaod sa Colombia, giisip nga deterrent to the commission of crimes by backriding motorcyclists.

Napirmahan ni Mayor Benhur Abalos August 13, ug prior sa pagpatuman, gihimo ang information drive pinaagi sa media, ug dagkung mga karatola, mga tarpaulin, ang gipabarog alang sa kasayoran sa publiko, labi na sa mga motorcyclists.

Unang adlaw sa implementation, gikan sa tungang gabii sa miaging Septembre  9, diin pagka-alas 2 sa kaadlawon, 110 dayon ang nadakpan. Tibuok adlaw miabot og 130. First offense P1,000 ang multa, 2nd ug 3rd offenses, P2,000 ug P3,000 respectively.

Ang ikaupat nga violation, tulo na ka bulan nga pagkabilanggo. Wa man silay CITOM didto, ang kapolisan ray gitugotan pagpanakop, samtang ang mga civilian traffic marshalls ug mga tanod makatabang pag-monitor. Ang mga violators gihatagan og lima ka adlaw pagbayad sa multa, aron malukat ang ilang mga driver’s license.

Daghan ang mihangyo, mi-eksplikar nga wala sila mahibawo sa maong ordinansa, ang uban nangatarungan nga gikan sila sa laing dakbayan, ug igo lang milabay sa Mandaluyong. Gi-warningan lang unta kono sila.

Tubag ni Jimmy Isidro, hepe sa public information office sa kapolisan:  We need to follow the ordinance … this is no longer a joke. Ug heading sa item sa Inquirer: “Over 130 male bikers discover Mandaluyong ban no longer a joke.”

Unsa man diay ning ubang ordinansa, komedya ra diay? Mao bay hinungdan nga ultimong pagsul-ob sa helmet dili ta kapatuman? Ug dili kita makasanta sa over speeding ug saba’ kaayo nga mga motorcyclist?