EDITORYAL - Anomaliya Nabulgar

Human gikawatan sa wala pa hiilhi nga mga tawo ang Toledo City Treasurer’s Office, nabulgar hinuon ang mga binuang sa pipila ka kawani sa mao nga buhatan.

Gusto na g’yud ni City Treasurer Ofelia Oliva nga pasilotan niya ni Mayor John Henry “Sonny” Osmeña kini’ng mga badlungon nga kawani sa Toledo City Treasurer’s Office.

Dili imposible nga daghan sa mga tax collectors sa Toledo nga hayan migamit sa personal sa kuwarta nga ilang nakolekta gikan sa mga magbubuhis nga wala nila dayon itugyan ngadto sa cashier.

Adunay usa ka kawani nga miabot na lang ang buwan sa Mayo apan ang iyang kinolekta nga buhis gikan sa Enero wala pa niya gi-remit sa cashier. Hain na man ang kuwarta?

Kon gipatuboan niya ang kuwarta og bisan 5 % lang nga interest dako na kaayo siya og ganansya sa puhonan nga dili iya? Sigurado si Oliva nga dugay na kini nga gihimo sa mga tax collectors sa Toledo ug nahibaw-an lang diha nga miasumer siya sa katungdanan.

Human miasumer si Oliva pagka city treasurer sa Toledo niadto’ng Hulyo, misugyot dayon siya nga mamalit ang dakbayan og mga Close Circuit Television (CCTV) camera aron ibutang sa City Hall.

Apan ang iyang tinguha gibalibaran sa mga konsehal. Kon may camera pa, tingali dali ra ang pag-ila kinsa ang mga tawo nga miadto sa City Hall ug misulod, dayon nangawat sa City Treasurer’s Office.

Ang City Treasurer’s Office sa dakbayan sa Sugbo nagkatap ang mga CCTV camera nga gipataod ni Oliva diha nga siya pa ang city treasurer. Karon, naleksyon na mo diha sa Toledo?