EDITORYAL – Dakong sagpa sa PDEA

Ang kadagkoan sa Philippine Drug Enforcement Agency (PDEA) mibutyag nga ilang nasayran nga ang mga tigpayuhot og ilegal nga drugas migamit na g’yud karon og “drug mules,” sa ato pa tawo na g’yud ang mobitbit sa drugas ug dili kay ipaagi pa sa private courier companies.

Nindot kaayo paminawon kay ang PDEA nasayod sa pamaagi sa mga sindikato apan makapangutana ang katawhan kon ngano nga wala man lagi sila’y nadakpan nga mga dinagko nga shipment? Wala man gani makahimo’g operation ang PDEA sa mga ilado nga druglords.

Kon ang kapolisan subsob nga nakaangkon og kalampusan sa kampanya batok sa gidili nga matang sa drugas ug sagunson sila nga nakasakmit og daghan nga shabu, apan ang PDEA wala g’yud, magduda na g’yud kita nga nagpatulog-tulog lang ang mga sakop sa PDEA.

Angay na tingali nga ang kadagkoan sa Regional Peace and Order Council (RPOC) mosukit-sukit na g’yud sa PDEA kon ngano nga kanunay ra man sila nga nagkyogpos sa ilang mga bukton ug wala’y gihimo sa problema sa pagkuyanap sa shabu.

Dili katuohan nga ang PDEA wala makadawat og report kabahin sa dako nga sindikato sa drugas diha sa Dumlog, Talisay ug diha sa Barangay Duljo-Fatima.

Matag higayon nga adunay dako’ng kalampusan ang kapolisan sa kampanya sa ilegal nga drugas maisip kini nga dako’ng sagpa sa PDEA kay ila kini nga trabaho apan ang kapolisan na ang mihimo.