EDITORYAL - Marka sa Gilas

Natagak ang Gilas Pilipinas sa kampanya niini sa 2014 FIBA Basketball World Cup didto sa Espanya pinaagi sa pagselyo sa Puerto Rico sa kapalaran niini. Resulta nga dili na angay ikahibulong ilabi na niadtong dugay na nga way pagsalig sa abilidad sa mga Filipino basketball sa world stage.

Apan dili makauuwaw ang performance sa mga Filipino inabagan sa naturalized player nga Amerikanong si Andray Blatche.

Daghan ang miingon nga ang Gilas Pilipinas "usa" lang ka team sa Asya, naanad na sila sa Iran, South Korea ug China.

Apan nakugang silang tanan dihang gilisod-lisod sa Pilipinas ang mga de kalibre'ng basketball giants sama sa Croatia, ang hawod sa Balkan region; ang Greece sa Mediterranean Sea ug Uropa,  ug ang labing makakurat mao ang diriyot nga kapildehan sa FIBA rank no.3 nga Argentina.

Mismo ang coach sa Argentina sa usa ka interbyu kaniya sa international media miangkon nga mao kadto ang "most uncomfortable match" nga iyang nasinati sukad nga siya nag-coach sa international competition. Ang experience sa Argentina sa Pilipinas, usa ka torneyo nga dili gyud nila makalimtan.

Napilde ang Pilipinas sa Puerto Rico nga maoy nagtapos sa kampanya niini aron makaabante pa sa sunod nga round. Apan sama sa natagamtaman sa tulo ka nasud nga gikasangka sa Gilas, dili sayon ang paglangkat sa Puerto Rico nga duna na say tulo ka pildi.

Nagbilin og marka sa international basketball ang Gilas, gagmay apan wala malubong. Pilde man o daog, way nawala sa Pilipinas.