Suklan ta ang tulisan

Kay kuwang man kita og mga polis nga makabantay kanato, angay na gayud nga magtinil kita og pusil. Tan-awa ang nahitabo sa tag-iya’g gasolinahan didto sa Toledo, napatay niya ang tulisan nga mitulis sa iyang balay-patigayon.

Alang nako walay problema ang pagtinil og armas basta lisensyado lang ug ang tag-iya adunay pagtugot nga madala-dala niya ang armas. Bisan og ako na man ang nahingtungdan sa maong tag-iya’g buwangan, pusilon nako ang tulisan kon duna ko’y armas.

Gusto g’yud unta ko nga makatinil og armas apan unsaon nga mahal man ‘sab ang kalibre 45 nga pistola. Imahen na lang ni Santo Niño ang kanunay nako nga gidala-dala ug dia kanunay sa akong bulsa kay sigurado ko nga iya akong tabangan.

* * *

Kini’ng mga tulisan, angay gayud nga pangtipion. Nangandoy man gani ko nga si Davao City Mayor Rodrigo Duterte anhi molansar pagka mayor sa dakbayan sa Sugbo aron mapitol kini’ng mga badlongon sa katilingban.

Tukma kaayo ang sinugatan sa pagsaulog sa National Crime Prevention Month kaniadto’ng Lunes kay miligdas nga wala nay kinabuhi ang usa sa upat ka tulisan nga mitulis sa gasoline station didto sa Barangay Luray II, dakbayan sa Toledo.

Kon kanunay nga mapatay ang mga tulisan atol sa ilang pagpanulis, sigurado ko nga mokalma kini’ng maong mga tulisan sa ilang binuang. Apan yuna pa, ngano nga nakayano-yano man lang kini’ng mao nga mga tawo pagdala-dala og armas?

Hain na man ang mga police checkpoint? Ngano nga wala na man ko makakita og mga polis nga nagpahigayon og checkpoint, ilabi na panahon sa gabii? Akong pangutan-on niini ang mga higala ko nga sila si Cebu Provincial Police director Noel Gillamac ug Cebu City Police director Noli Romana.

Nindot g’yud kaayo nga adunay subsob nga checkpoint operations kay sagad gud sa mga tulisan magsakay man og motorsiklo. Tagsa ra g’yuy mga tulisan nga magsakay’g awto mao nga ang sagad parahon sa mga polis mao ang magsakay’g motor.

Samtang padayon ko nga nagsuwat niini’ng lindog, giteksan ko ni Senior Superintendent Romana ug gipahibalo nga mohimo sila pagbalik og sagunson nga checkpoint operations. Sige friend, unya kon adunay mga tulisan nga mosukol, nasayod na kamo kon unsay tukma nga himuon.

Maayo nga tudloan og leksyon kini’ng mga tulisan. Dili angay’ng kaloy-on kini’ng mga tawhana, hinuon angay sila nga patagmon.