Laban Pilipinas!

Mainiton ang suporta nga gihatag ngadto sa Gilas Pilipinas sa mga Pilipino bisan asang dapita sa nasud. Karon pa, human sa 36 ka tuig, diin kita nakabalik sa FIBA World Cup. Busa angay lang ta nga malipay.

* * *

Dinhi sa ato sa Sugbo, mga lumolupyo sa panimalay nga dunay telebisyon biyaan ang tanang gihikay atol sa duwa sa Gilas Pilipinas. Bahala na’g unsang orasa -- magabii, natungang gabii, makaadlawon.

* * *

Bisan ang mga ginang sa panimalay mobiya sa ilang paboritong teleserye aron sa pagtan-aw sa atong kuponan sa basketball nga nakigharong sa mga  banggiitang kaatbang didto sa Espanya.

* * *

Diha sa usa ka kan-anan sa Gorordo Ave. grabeng hinugyaw sa mga nanan-aw sa tv atol sa duwa sa Pilipinas vs. Croatia dihang nakatabla ang Gilas ug gani hapit gyud makadaug. Nakapahuway og makadiyot sa ilang trabaho ang mga waiter ug cook sa maong kan-anan.

* * *

Didto kuno sa Cagayan de Oro gideklarar nga wa’y tungha sa pipila ka eskuylahan atol sa duwa sa Gilas Pilipinas. Ug didto sa siyudad sa Bacolod gigastuan gayud sa usa ka sugar planter ang pagmontar og wide screen nga tv set sa usa ka barangay diin nahimutang ang residensya sa maong planter.

* * *

Win or lose -- modaug man o mapilde -- angay tang suportahan ang atong national team. Kini suma pa ni retired Philippine Constabulary Capt. Gerardo Camino Sr. kinsa national basketball player sa bata pa siya didto sa Manila.

* * *

Busa tugoti nga moapil kita sa singgit nga: Laban Pilipinas, puso!