Samtang nag-ungaw sa kakuyaw ang kaliboan ka Pilipinhon ug ubang peacekeepers sa United Nations (UN) sa Syria ug ubang naggubot nga kanasuran, may laing gubat nga niulbo sa UN General Assembly: Angay bang umintohan nang ilang suholan?
Ang Bangladesh, nga maoy labing daghan og mga polis ug sundawo nga gisuweldohan sa UN, ug ubang kabos nga mga nasud maoy kusganong niawhag nga usbawan ang suholan nga nalansang sud na sa 19 ka tuig. Alang nila hagbay rang nabiyaan sa panahon ang binuwan nga suholan nga $1,210 (P52,000). Apan kusganong nisupak ang dagkong mga nasud nga maoy moabaga sa labing dakong bahin sa budget sa peacekeeping.
* * *
Labihang inita sa lalis nga wa mahusay hangtod nga napupos na lang ang budget sa niaging tuig niadtong Hunyo 30. Nilungtad og tulo ka adlaw ang kalibutanong kalibog unsay dangatan sa UN peacekeepers kay wa pay bag-ong budget nga naaprobahan. Maayo na lang nga naaprobahan gyud ang 17% nga uminto sa suholan, nga maoy labing dako sa niaging 35 ka tuig.
Sugod niadtong Hulyo 1 ning tuiga, $1,332 (P58,000) na ang dawaton sa matag UN peacekeeper matag buwan. Sa ikatulong tuig, 2016, mosaka ang suholan ngadto sa $1,365 (P59,000) ug dayon mahimong $1,410 (P61,000) sa ikaupat nga tuig.
* * *
Mao ni hinungdan nga bisan sa katandugon sa kahimtang sa mga nasud nga ilang madestinohan, mag-ilogay ang mga polis ug mga sundawo sa Pilipinas ug ubang kanasuran pagboluntaryo sa UN. Kon madawat, garantisado nga labing mubo usa ka tuig nga kontrata ang ilang madawat.
May pipila ka polis ug sundawo sa Sugbo ug kasilinganan nga mga lalawigan nga nakaapil sa UN peacekeeping operations sa nangaging katuigan nga, human sa 12 ka buwan nga grabeng risgo ug kamingaw, nakatukod og mga pinuy-anan, nakasugod og mga patigayon ug nakapalambo sa ekonomikanhong kahimtang sa ilang mga pamilya.
* * *
Di hinuon makiangayon ang pasangil nga ang mas dagkong suholan maoy hinungdan sa kaisog sa 71 ka Pilipinhon nga UN peacekeepers sa Golan Heights nga nisukol sud sa duha ka adlaw inay mutahan sa ilang mga armas sa kapin sa gatos ka mga rebelde sa Syria nga niguba na sa ganghaan sa ilang kampo ug nibombardiyo na sa ilang nahimutangan.
Kasagaran nila beterano sa mga gubat sa Sulu ug Basilan. Nakadawat sab og tabang gikan sa mga gobiyerno sa Syria, Israel ug Ireland. Timaan sab sa kakuwang sa disiplina ug kalatagaw sa mga rebelde, ang ilang pagpanghagok sa tungang gabii niadtong Domingo sa Syria (alas-5 sa kadlawon sa oras sa Pilipinas) human sa pito ka oras nga pinusilay, maoy nihawan sa agianan sa mga Pilipinhon, nga hapit na mahutdi og bala, sa pag-ikyas.