Political will g’yud!

Mosugod na kuno ang Cebu City Legal Office pagpadala og mga Notices of Violations ngadto sa mga tag-iya sa business establishments nga miukopar sa tampi sa mga sapa, labaw na kadto’ng anaa g’yud mitabon sa kasapaan.

Pastilan, sayon ra kaayo ang pagpadala og Notices of Violations apan ang pagkab-ot og kalampusan sa tinguha nga panggub-on ang mao nga mga illegal nga straktura lisud kaayo.          

Dihang si Mayor Michael Rama midaog pagka mayor kaniadto’ng 2010, iya dayon nga gipahibalo nga usa sa iyang tinguha mao ang pagpabalik sa “three meter easement” nga sa ato pa, hawanan ang daplin sa kasapaan.

Apan nahuman na lang ang una nga termino ni Mayor Rama, wala g’yud mabungkag ang mga dagko nga balay-patigayon. Dunay nahawan pero kadto ra’ng mga dapit nga giugbokan sa gagmay nga kabalayan.

Dako kaayo kini nga hagit sa pamunoan ni Mayor Rama kon iya ba nga mapatuman. Diri sa downtown area daghang mga tindahan ang gitukod lagbas sa Parian Creek.

Ang kabahin sa Lahug River nga anaa moagi kilid sa General Maxilom Avenue ug dalan San Jose, gitukoran usab og dako’ng hotel. Ang tampi sa Mahiga Creek nga nahimutang kilid sa Block 27 sa North Reclamation Area, gi-riprap ‘sab og gigamit sa VECO.

Diha sa Mabolo habig sa Subangdaku, Mandaue, ang sapa gitabonan ug gigamit sa usa ka motel. Basta, pwerte’ng daghana nga kalapasan nga nahimo. Malipay g’yud ko kon tinud-on ug dili kay kutob ra’s pagarpar ni’ng maong isyu.

Kon dili gud madutlan ang mga adunahan, ang publiko makaingon nga maayo lang ang dakbayan sa Sugbo nga modaug-daog sa mga pobre nga nagpuyo sa daplin sa kasapaan, apan kon kuwartahan dili makadulot.

Ang Notice of Violations nga giandam na sa City Legal Office nagmando nga ipaguba ang mga illegal structure. Pastilan, guba g’yud? Mosugot kaha kini’ng mga abusado nga magpapatigayon nga gub-on ang ilang mga dagkong tindahan, mga hotel ug uban pa?

Daghan man gani kaayo nga lugar nga bisan ang aseras wala nato mapabalik. Tan-awa ra gud kon aduna pa ba’y aseras ang dalan Sikatuna gikan sa eskena T. Padilla? Mao pay hagip-ot kaayo ang mao nga karsada unya wala lang tagda sa mga opisyal sa dakbayan ang miabuso paggamit sa aseras nga kabahin sa balay.

Unsay kapuslanan sa PROBE Team? Kadaghan sa mga sakop sa PROBE unya walay nahimo? Ang letra nga “R” sa PROBE nagkahulogan nga “Restoration.”  Sa ato pa, ibalik ang naandan. Wala man    lagi?