Kuhaan aron modaghan

Ang tanom kon diotay ra og bunga, kuhaan o kutloan kini sa sanga, aron modaghan ang salingsing, nga inig bunga niini modaghan na usab. Sama sad sa sudlanan nga napuno na sa tubig, nausik kay ga-awas lang. Angay unta kuhaan kini aron kasudlan na pud og lain, hangtud makapundo og daghan.

Unya, sagad sab nga anaa sa atong panghunahuna, bisag nag-awas na sa bahandi ug  katigayonan, padayon gihapon ang pagtigum aron mapun-an pa. Gausik lang nga gilakwatsa sa mga bisyo o buhat nga wala’y kapuslanan. Hangtud nga mao na lamang ang naamgohan, naut-ot na ang tanan niyang hinagoan. Sa ato pa, nangabuslot ang iyang mga panudlanan.

Ngano unsa man ang mga hinungdan niining tanan? Kini tungod kay ang angay unta niyang buhaton kon mapuno na ang iyang sudlanan, kuhaan kini. Pinaagi sa paghatag sa uban o ipaambit nga makatabang sa paghatag og kahigayonan. Dalaygong buhat kini sa kahitas-an. Nga mahimong galamiton, sa pag-asenso sa ubang mga tawo, tungod sa maayo mong pagserbisyo.

Maalagaron, nga kon kini maoy mithi sa atong kinabuhi, dili ka lang unya makamatngon nga mas midaghan na nga wala nay kasudlan. Kay ang mga tawong gitabangan mo, mohatag nimo pagbalik sa ilang bayad, sa utang kabubut-on nila diha kanimo. Mounong sila, aron suklian pa ang pohunan mo.

Busa ayaw itugot nga mahitabo kini, nga tungod sa kataas sa pangandoy sa kinabuhi, nga imbes malipayon kita, nahimo hinuon kitang labi pang naalaut. Kay nadat-ogan sa subrang bahandi, wala na matarong ang kinabuhi.