Nahibawo na tang daan unsay mahitabo sa impeachment complaints nga gipasaka batok ni Presidente Noynoy Aquino. Maong makapakugang ang talagsaong lugway nga gihatag sa mayoriya sa mga sakop sa House Justice Committee sa tulo ka impeachment complaints nga bisan sa pipila ka teknikal nga kakulian ilang gipatigbabaw nga nakatuman sa tanang panginahanglan sa porma.
Gipatigbabaw sa komitiba ang awhag ni Kongresista Neri Colmenares sa Bayan Muna nga sundon lang ang naandan sa piskaliya nga patubagon dayon ang sinumbong kon may ipasakang kaso. Nitabang pa gani si Kongresista Neil Tupas Jr., tsirman sa komitiba, ug ubang alyado sa administrasyon pagluag sa lagda ug paghatag sa tanang kahigayonan sa mga kihante.
* * *
Klarong nadutlan ang mga alyado ni Presidente Aquino sa gibalikbalik nga pasumbingay ni Colmenares, ang labing lantip sa mga kihante, nga hinaot nga ang kapaspas sa iyang kaubanan pagduso sa impeachment complaints batok nilang kanhi Ombudsman Merceditas Gutierrez ug kanhi chief justice Renato Corona di tugbangan sa hingpit nga pagbangil tungod lang kay si Aquino nay sinumbong.
Gitataw gyod gani sa mga kongresista nga sakop sa Liberal Party (LP) nga ang sangpotanan sa botasyon--pagduso sa tulo ka impeachment complaints ngadto sa sunod nga hugna--maoy pagmatuod nga di sila sama sa mga itoy ni kanhi presidente Gloria Arroyo nga niluok sa tanang impeachment complaints batok sa ilang agawon.
* * *
Apan pipila sa tag-as ug nagtuyuk-tuyok nga mga argumento sa mga alyado ni Aquino pagbasura sa impeachment complaints--nga gikinahanglan ang higpit nga paghubad sa mga lagda kay ang labing taas nga opisyal sa republika maoy gitakdang palagputon sa katungdanan--makapahinumdom nato nga wa silay kalainan sa mga tigdupa ni Arroyo niadto.
Gani, pipila sa mga alyado ni Aquino karon mao ra sab ang mga kakonsabo ni Arroyo sa unang panahon. Ang paspas nilang pagbalitok ug ang sama kapaspas nga pagdawat sa Malakanyang nila maoy usa sa labing masulub-on nga komentaryo sa kahimtang sa politika karon.
* * *
Nahibawo na ta unsay mahitabo sa mosunod nga botasyon may igo bang mga ebidensiya sa pagpalagpot ni Aquino. Di nang kapaabot ang mga kihante nga paluagan lang gihapon ang mga lagda. Klarong dinalidali ang pag-andam sa impeachment complaints nga ang usa nila igo lang nikutlo sa privilege speech ni Senador Jinggoy Estrada ug sa mga taho sa media mahitungod sa Disbursement Acceleration Program (DAP).
Mas hingpit ang pagkontrolar ni Aquino sa Kongreso: Ang House ray gigawongan ni Arroyo sa una apan si Aquino may mayoriya hasta sa Senado. Bisan silang Colmenares ug kaubanan nahibawo nga wa silay igong mga sukaranan pagkumbinser sa mga alyado ni Aquino pagbukubuko niya. Apan hangpon nilang tanang kahigayonan pagpakauwaw ni Aquino kon lugwayang proseso ug kon lakturon makapasangil nga giluok sila sa administrasyon.