Ang nahitabo ni Alcoy Police Chief Crisanto Abella usa ka maayo nga pagtulon-an sa ubang mga polis ug tigpatuman sa balaod.
Adunay daghang nakakita nga naglakip sa pipila ka polis nga sa wala pa pusila si Inspector Abella nakig-inom siya og ilimnong makahubog sa suspetsado gawas nga bahin sa sports complex atol nga adunay gihimo nga boksing sa Barangay Poblacion, Alcoy kaniadtong Domingo sa gabii.
Buotan ug respitado nga pagkatawo si Inspector Abella kay mosaludo g’yud gani kini kon mosulod sa opisina ni Mayor Nick Delos Santos ug dili molingkod hangtod nga awhagon siya pagpalingkod.
Matud sa mayor nga usa kini sa rason nga gipabilin niya kini nga hepe sa kapolisan sa Alcoy bisan og gusto na unta sa kadagkoan sa Cebu Provincial Police Office (CPPO) nga siya pahulipan sa katungdanan.
Ang pagka hinginom ra g’yud ni Inspector Abella og ilimnong makahubog maoy nakadaot kaniya ug nakaputol sa iyang propesyon nga mao ang pagserbisyo sa katawhan.
Dili tuod g’yud maayo nga ang usa ka tigpatuman sa balaod makig-inom og ilimnong makahubog diha sa publiko nga lugar, ilabi na kon adunay kalihukan nga ilang gibantayan aron mapatunhay ang kahusay ug kalinaw.
Daghan pa nga mga opisyal sa kapolisan, ilabi na diha sa kalungsoran, nga moinom usab og ilimnong makahubog sa publiko nga mga lugar.
Maayo unta og ang nahitabo sa maong opisyal sa kapolisan kapanaminan sa ubang hepe ug bisan sa mga yano nga polis, nga dili nila sundon ang mao nga sayop nga binuhatan.