EDITORYAL - Baynte anyos na kami

Baynte anyos na ang Banat News karong adlawa. Baynte ka tuig nga walay paglubad sa paghatud og serbisyo publiko pinaagi sa wala’y pagduha-duha ug matinud-anong pagbalita ug pagpaambit og mga impormasyon nga kinahanglang masayran sa katilingban.

Ang Banat News di mahimugso kon dili pa tungod sa mamugnaong huna-huna sa mga tawong maoy unang mihulma niini niadtong tuig 1994.

Gikan sa sinemana nga paggula kaniadto ,  sud lang sa pipila ka adlaw dali kining nakaangkon og mga bumabasa nga hangtod karon pabiling nagsunod sa Banat News.

Kon kaniadto sa Cebu City lang naglibot ang sirkulasyon niini, karon tibuok Central Visayas, Eastern Visayas ug pipila ka bahin sa Western Visayas ug Mindanao na ang naabot sa inyong Banat News.

Usa kini ka pagmatuod nga maayo ang nahimong dagan sa pagdala sa Banat News gikan pa kaniadto hangtod karon.

Sa pag-abot sa panahon, nasukod ang katakos sa Banat News sa natad sa pagbalita pinaagi sa nadawat niini nga mga major awards gikan sa prestihiyosong Cebu Catholic Mass Media Awards sud na sa walo ka nagsunod nga tuig.

Dili maabot sa Banat News ang maong kalampusan kondili pa sa way putol nga suporta sa Chairman niini nga si Sir Jose "Dodong" Gullas ug sa iyang pamilya ug walay paglubad nga sakripisyo sa atong publisher nga si Juanito V. Jabat. Karon mas milig-on pa g’yud human nga nasakop kini sa labing dako nga media group sa nasud, ang Philippine Star Media Group.

Daghan pang mapaabot nga kabag-ohan ug pagpanindot nga himuon sa matag pahina sa Banat News aron mas matagbaw pa gyud niini ang mga suking tigbasa ning kinaham nga inadlaw-adlaw nga tabloid sa Kabisay-an.