Nahuman ang lima ka adlaw nga pagduaw ni Pope Francis sa South Korea nga nagbilin og dakong hagit sa mga Katoliko. Sa iyang pakighinabi sa mga obispo gikan sa 22 ka nasud sa Asya, iyang gi-awhag ang mga lider sa simbahan nga mohimo og mga lakang nga maki-angayon sa ubang tawo aron nga mas bukas silang modawat sa Katolikong pagtuo.
Iya hinuon nga giklaro nga wa’ kini magpasabot nga kalimtan ang pagtahod sa mga doktrina sa simbahan sa ilang pagsanong sa maong panawagan. Dako kini nga gimbuhaton labi pa nga wala pa’y maayo’ng relasyon ang Vatican ug ang nasud nga adunay labing dakong populasyon—ang China.
Apan dili lang ang China ang nibabag sa Kristohanong pagtuo. Hangtud karon dili pa bukas nga modawat sa pagtuo nga Kristiyano ang kadagkoan sa North Korea ug Vietnam. Swerte ‘ta nga nagpuyo og nasud nga bukas ang gobiyerno sa pagdawat sa bisan unsang pagtuo.
Apan kun nahisakop ka sa maong mga nasud, lisud ang pagpadayag sa imong pagtuo o relihiyon tungod sa padayong pagpig-ot sa ilang gobiyerno. Ug ang labing dakong hagit ngadto sa mga Katoliko nagpasabot nga mosaka unta ang populasyon sa mga Katoliko sa Asya nga karon niabot lang og 3.2 %.
Unsaon pagsanong sa gipangayo ug sa gihagit sa Santo Papa kon mismo ang mga parokya nagkabaguod na sa problema ug nagkagidlay na sa daghang mga yangungo gikan sa mga layko? Ang labing dakong problema sama sa pagpabadlong sa mga pari, pagpangurakot, pagpuyo nga luho ug uban pang matang sa mga butang nga gidili unta sa simbahan.
Kon dili makalimpyo ang usa ka pari sa mismo niyang parokya, unsaon pa kaha niya nga mamahimong epektibong modani sa uban sa pagsakay sa iyang pagtuo?
Kun napakyas na siya sa pagpuyo nga ligdong ug nahasubay sa mga mando sa Vatican, unsaon pa man pagtuo sa mga tawo sa iyang pagka-maayong pari?
Enero sunod tuig gipanglantawan ang pag-usab sa dagan sa pagpuyong espirituhanon sa mga Pinoy sa gitakda nga pagduaw ni Pope Francis. Apan dili mga politiko ug adunahan nga mga tawo ang iyang gitinguha nga mahimamat.
Buot nga makauban sa Santo Papa sa pagpangaon ang mga kabus ug mga biktima sa katalagman. Kadtong mga tawo nga naglisud pa unsaon sa pagdawat nga nakalas ang ilang mga mahal sa kinabuhi tungod sa trahedya. Pagka maayo ug pagka tataw sa maong mensahe gikan sa Papa --- ug aron ka makadani sa imong pagtuo, unaha ang mga kabus ug ang mga dinaog-daog.(Email: ricolucena@yahoo.com or ricolucena@ilovecomarts.com)