EDITORYAL - Usbawan ang buhis

Naanad na ang mga magbubuhis nga gagmay ra kaayo ang gibayran nila nga buhis ngadto sa dakbayan sa Sugbo mao nga kon adunay sugyot nga “rate adjustment,” moreklamo dayon sila.

Mao kini ang gihimo sa mga vendors sa lainlaing kamerkadohan dinhi sa dakbayan tungod sa sugyot nga ang ilang bayranan himuon na nga P30 sa matag metro-kuwadrado nga luna nga ilang giukopar.

Sigurado nga ang mga tag-iya og real properties sama sa kayutaan, building ug makinarya, moreklamo usab kon ang City Assessors Office mohimo og susama nga sugyot.

Kapin sa 10 ka tuig na nga ang buhis sa mga real properties dinhi sa dakbayan wala kahimoi og kausaban bisan pa man nga ang balaod naglatid nga adunay “tax revision” sa matag tulo ka tuig.

Wala’y mga politiko sama sa konsehal sa dakbayan ug tingali bisan diha sa kalungsoran nga nagbaton og kaisog paghimo’g sugyot nga usbawan ang buhis sa mga real properties.

Ang nagpugong kanila mao ang kabalaka nga kon ila kining himuon basin og dili na sila makadaog kon sila magpapili pag-usab sa katungdanan sa kagamhanan.

Resulta, ang katawhan magtuo na nga ang mga opisyal nga mosugyot pagpausbaw sa bayranan nga buhis miabuso sa ilang katungod.

Dili angay’ng lalison nga ang kagamhanan kinahanglan gayud nga mopausbaw sa “tax rate” aron matubag niini ang panginahanglan sa katawhan.

Ang isyu mao nga angayan usab nga timbang-timbangon sa mga konsehal kon pila ang kantidad nga ilang ipausbaw aron dili makalitan ang mga magbubuhis.