EDITORYAL - Tinonto ni Sotto

Adunay sugyot si Senador Vicente “Tito” Sotto nga dili na paangkasan og laing tawo ang motorsiklo gawas kun ang moangkas asawa o pamilya sa drayber nga maoy tag-iya sa motor.

Matud sa senador nga usa kini sa nakita niya nga paagi aron pagsanta sa mga tulisan nga maglumon pag-angkas sa motorsiklo sa ilang paghimo sa krimen.

Daghan kaayo nga nakasaway ni Senador Sotto niini’ng iyang nahuna-hunaan. Kun kini ipatuman sa hingpit agian na lang unya nimo ang imong suod nga higala nga maglakaw sa karsada bisan og mahimo man unta kini nga paangkason kun ikaw ra ang sakay sa motor. Bisan si LTO-7 Regional Director Arnel Tancinco miangkon nga kun kini ipatuman sa tanang dapit sa nasud sila maglisod pagpatuman tungod kay hasol kaayo.

Kinahanglan pa nga ang road law enforcer mopara sa magsakay og motor nga adunay angkas unya pangitaan kini og birth certificate aron pagmatuod kun asawa o anak ba ang nag-angkas.

Wala man gani mapatuman sa LTO ang pagpanakop sa ubang mga dakponon, pun-an pa man hinuon niini’ng sugyot ni Senador Sotto nga mahulagway nato nga makipobre.

Suwerte lang si Senador Sotto kay kuwartahan man siya og takus man mopalit og sakyanan. Husto si Tancinco nga ang tukma nga hugtan pag-ayo mao ang pagsukod kun kinsa kadtong angayan nga isyuhan og lisensya pagmaneho og sakyanan.

Daghan diha nga maantigo na mosakay og bisekleta, dayon molukat na og lisensya. Unya mopalit dayon og motor. Resulta, nadugangan ang mga abusado sa kadalanan.