Human sa napulo ka tuig nga kumbati sa korte, pildi sa iyang kaso nga pagpatay ang kontrobersiyal nga si SPO1 Adones Dumpit, ang usa sa mga gikaintapan nga pulis sa dakbayan sa Sugbo kaniadto.
Basi sa desisyon sa korte sa niagi’ng semana, mabilanggo si Dumpit og hangtud sa siyam ka tuig tungod sa iyang pagpusil patay sa suspetsado nga tulisan nga si Ron-Ron Go atol sa usa ka operasyon.
Hinuon, suwerte pa gihapon si Dumpit. Kini tungod kay gi-degrade sa korte ang iyang kaso. Gikan sa murder nga una’ng gipasaka sa kabanay ni Go, gihimo na lamang kini nga homicide sa korte tungod sa kakulang sa ebidensiya.
Bisan pa man niini, guilty verdict ang gipagawas sa korte batok sa maong pulis. Wala kunoy duda nga si Dumpit ang nagpusil patay kang Go. Ug nga angay siya nga mabilanggo ug magbayad ngadto sa pamilya sa biktima.
Ug niini’ng iya’ng pagkakonbikto, adunay pangagpas sa pipila nga basin kuno unya kun ma-demoralize ang ato’ng kapolisan. Basin kuno unya kun mahisama sila’ng Dumpit bisan pa man kun nagtuman lamang sila sa ilang trabaho.
Hinuon dili kana kalikayan gumikan kay usa kini sa mga risgo sa trabaho sa kapolisan. Kabahin kini sa delikado nga inadlaw’ng gimbuhaton sa usa ka pulis tungod usab sa nagkatap nga mga bugok sa katilingban.
Dili gayud ikalimod nga ang police service maoy usa sa mga kuyaw nga propesyon. Ug dili gayud lalim ang pagsunod sa serbisyo pagpatuman sa kahusay ug kalinaw, ilabina sa mga lugar nga puno sa mga badlongon sama ning ato’ng dakbayan.
Apan ngano nga ma-demoralize man ang ato’ng kapolisan sa dakbayan niini’ng konbiksiyon ni Dumpit? Nagpasabot ba lamang hinuon kini nga kulang sila sa kaikag pagtuman sa ila’ng propesyon nga mao ang pagprotehir sa katawhan?
Hinuon, dako’ng challenge karon kini’ng gidangatan ni Dumpit ngadto sa ato’ng kapolisan. Nga kinahanglan pahugtan pa nila ang ila’ng bakos sa ila’ng inadlaw nga pagserbisyo sa publiko.
Wala’y duda nga nagtuman lamang si Dumpit sa tawag sa iya’ng propesyon sa diha’ng iya nga napatay si Go. Apan ang nakapait mao nga dunay sipyat nga nakita ang korte. Ug kana maoy angay nga bantayan sa ato’ng kapolisan.