Duha ka lungsod dinhi sa Sugbo – ang Consolacion ug Moalboal – ang hatagan og trak sa bombero sa kagamhanan sa Daito City, Osaka, Japan aron magamit kun may sunog sa mao nga dapit.
Si Daito City Councilor Hiroshi Iwabuchi mianhi gayud pagtuyo sa Sugbo ug nakigkita ni Bureau of Fire Protection (BFP)-7 regional director Ma. Luisa Hadjula.
Apil nga nakigtagbo sa Japanese official mao sila si Consolacion Mayor Teresa Alegado ug Moalboal Mayor Inocencio Cabaron. Ang ilang panagtagbo maoy paghingpit sa donasyon sa mga firetrucks.
Bunga kini sa paninguha ni Senior Supt. Hadjula ug sa kadagkoan sa BFP-7 diin personal sila’ng mibiyahe didto sa Japan pinaagi sa imbitasyon ni Daito City Mayor Koichi Higashisaka.
Sa ilang pag-adto sa Japan, gipasigarbo dayon sa mga Japanese official ang ilang moderno nga kahimanan sa pakigkombati sa sunog.
Lakip nga ilang gipakita mao ang mga ambulansya ug uban pa nga ekipos sa kabomberohan. Gisaaran sila sa mayor ug sa konseho sa Daito City nga hatagan og tulo ka firetrucks nga 3 years pa nga nagamit.
Matud ni Hadjula nga nindot ug moderno kaayo ang kahimanan sa kabomberohan sa Daito City. Ug gani ang mga firetrucks nga buot ihatag sa Sugbo mga nindot ug maayo pa kaayo ang kondisyon.
Nahibaw-an nga matag 3 ka tuig mag-ilis na sila sa Japan sa ilang firetrucks og bag-o ug ang ilang ginamit ipanghatag na lang nila sa mga nasud nga nagkinahanglan niini.
Sukwahi kaayo kini sa atoa dinhi sa Pilipinas, kay ang atong mga firetrucks kapin na sa 20 ka tuig apan nagpabilin pa gihapon nato nga gigamit. Hinoon duna man kitay mga bag-o’ng firetrucks nga napalit apan nagdaghan gayud ang mga kagang-kagang ug panahon pa ni “Mampor.”