Polis sa Carbon nagmika

Pastilan, kun hutdon nako og suwat ang tanang reklamo nga akong madawat, ilabi na ang kabahin sa ilegal nga drugas ug sugal, dili masulod dinhi sa luna para sa akong lindog.

Unya, ang Carbon Police Station dili g’yud diay molihok bisan pa og atong biradahan ug awhagon nga pangsakmiton ang daghang karera nga anaa ra g’yud likud sa ilang police station.

Karon pa ko nga maghuwat ra g’yud diay sila og order gikan ni Colonel Noli Romana usa sila molihok. Husto kaha kini’ng mao nga mga polis? Kinsa ba’y hepe diha sa Carbon Police Station?

Sa miagi nako nga lindog, gibutyag nako nga pwerte’ng daghana nga mga video karera nga nag-operate diha sa Sitio Bato, ug kanang mga balay-balay diha dapit sa Carbon Market Unit 2 ngadto na sa Unit 3.

Hangtod karon, wala g’yud molihok ang kapolisan diha sa Carbon. Nauwaw na lang gud ko sa mga mi-report nako nga nangutana kun ngano nga wala gihapon makuha ang mao nga mga sugalan.

Gihatagan na gud nako sila og lugar kun asa sila mangita, apan wala lang gihapon. Unsa may inyong gusto? Nga hinganlan nako tagsa-tagsa ang tag-iya sa mga balay o tindahan nga nagtinil og mga karera?

Kun kini man gani  ang inyong gusto, tabla ra og “magbasa lang ang inyong kamot kun mokaon.” Susama ra nga gihungit na kaninyo ang inyong mga trabahoon?

Abi ninyo og ngano’ng kusog kaayo ang video karera diha likud sa Carbon Market? Tungod kay magbuntagay ang mga tawo diha nga maninda ug mangompra.

Ang mga tawo nga magsuroy kay mangita’g barato nga mapalit kun makakita sa electronics gambling machines nga anaa ra duol sa Carbon market, aw matental g’yud.

* * *

Kanindot unta kun ang mga sakop sa LTO mohimo na g’yud og pagpanakop sa mga drayber sa sakyanan kang kansang plate numbers ila nga gitaptapan og mga tabon nga lisud na mabasa.

Apilon unta nila pagdakop kini’ng mga “walay buot” nga mga motorista nga ang ilang plate numbers gitagoan kun gipasok sa ilawom sa tapaludo ug ang uban naa gipapilit sa kilid nga dili makita sa magsunod.

Dili g’yud angay’ng kaloy-on kini’ng mao nga mga motorista. Ambot, kanus-a ‘sab kaha mopahingusog si LTO-7 director Arnel Tancinco ug Assistant director Alita Pulga sa pagpanakop ani nga mga drayber.

Gikapoy na lang ko pagpasabot ngano nga gidili ang pagtaptap og mga dark glasses o plastic sa mga plate numbers.