“Dili angay balhinon si Lapulapu”

Ang pagbarog ni Lapulapu sa Agrifina Circle sa Luneta, dungog natong mga Bisaya partikular sa Mactan kay si Lapulapu taga Mactan. Kun miingon ang tsirman sa NHI kon National Historial Institute nga ang Luneta alang lang kang Rizal, usa ka hinakog ug dili makiangayon. Si Rizal, bayani nga napukan, samtang si Lapulapu bayani nga nagmadaogon kay siya maoy nagpatay kang Magellan.

Dili maayo nga hilabtan si Lapulapu sa iyang nahimutangan karon sa Luneta. Kun moadto kita’g Manila, kadaghanan kanato mosuroy baya og Luneta. Motan-aw sa bantayog ni Dr. Jose Protacio Rizal, ug kay anaa man sab si Lapulapu sa Luneta sa Agrifina Circle, atong bisitahan ang iyang bantayog. Kun mahimo pa gani atong isinggit sa upat ka suok sa kalibotan nga si Lapulapu na, ang Bisaya nga manggugubat nga maoy nipatay kang Magellan.

Kun si Lapulapu mao pay gipatay ni Magellan, tingali way bantayog si Lapulapu. Ang Opon nga kaniadto lungsod, tingalig Opon gihapon hangtod karon. Opon City tingali. Apan giilisan og Lapulapu City pahinungod kang Lapulapu, sa iyang kaisog ug katakos sa pagpakig-asdang sa mga langyaw manggugubat nga gipangulohan ni Ferdinand Magellan nga nangahas pagtaak sa iyang baybayon sa Mactan.

Atong ipabilin si Lapulapu sa Agrifina Circle sa Luneta aron ang mga tagalog nga nakamenos kaayo natong mga Bisaya dili magpasiatab sa ilang baba nga sila ray hawod, sila ray makamao. Kita diay, dili?