Dili mahitabo ang Constitutional crisis

Niining controversy karon sa Supreme Court ruling nga nag-declare nga unconstitutional ang Disbursement Acceleration Program (DAP), it is but normal nga ang mga kaatbang ni Presidente Noynoy Aquino, naglaum g’yud nga mag-krisis ang atong nasud.

Ang mga newspaper columnists, ug mga radio-TV commentators nga all of a sudden nahimong expert ug specialist on the Constitution ug nahimong mga political analysts, nagpasidaan nga malagmit adunay krisis sa Batakang Balaud.

Alang nako, bisa’g dili ko political analyst sama nila, ug samot pa’ng dili Constitutionalist, I beg to disagree. Sa akong ubos ug pinobre nga pangagpas, I don’t think nga mahitabo ang ilang gipaabot ug gilauman nga Constitutional crisis.

The fact nga miapelar si Noynoy, mihangyo nga i-reconsider ang ruling sa Korte Suprema, nagpasabot nga mitahod siya sa Labaw’ng Hukmanan, despite sa nagbangi nga mga opinion.

Huwat lang ta sa final decision. Apan, maunsa man ang hukom, mapabor man ni Noynoy o dili, I don’t think nga magubot ang atong nasud. Bisa’g unsaon paghaling sa opposition aron masuko ang katawhan ni Noynoy, dili ko motuo nga maka-trigger na kini’g national disaster.

* * *

Usa sa nakapasamok pag-ayo sa atong trapiko dinhi sa siyudad mao gayud ang mga PUJ’s nga pataka lang og hunong ug nakadugang sa problema sa kahuot sa karsada.

Ang mga PUJ’s pasagad la’g hunong, bisa’g asa lang mo-stop aron pag-pick up ug pagpakanaug sa pasahero. Paturagas la’g padagan, overtake dinhi, overtake didto. Mga “king of the road.” Unya, dili pa kamao nga mosukli.

Inigpakanaog ug inigpasakay og pasahero, dili magpadaplin, hadlok maka-overtake ang nagsunod nila nga PUJ. Kun approaching sa traffic lights, maghinay-hinay aron maka-timing sa STOP signal diha sa eskena sa tumong nga maka-pick-up og dugang pasahero.

Inigka-gabii, dili magpasiga sa suga, labi na ang headlights sa sayop nga pagtuo nga makadaginot kuno sa bateriya sa walay paghuna-huna sa safety sa ubang motorist.

Ambot ‘sab kun ngano nga gipasagdan man lang kini sa Citom? Usa ‘sab kini sa nakadugang sa problema sa kadalanan …ang lax of enforcement sa mga traffic laws. Mao nga nagsalig lang pud ang mga driver sa mga PUJs.

Mao nga daghan ang nalipay sa pagpataas sa mga multa ug silot sa mga traffic violators. Magmatngon ug magbinuotan na unta ang mga driver sa public utility vehicles.

Maghuna-huna usab unta sila nga daghang kinabuhi ang gisalig sa ilang mga kamot sa higayon nga magmaneho na sila sa ilang mga sakyanan.

Alang nako dili maayong paubsan ang multa sa mga traffic violators, aron nga magmatngon na gayud sila sa ilang pag-drive. Ug aron masilsil sa ilang utok nga samtang igo lang silang nanginabuhi, wala kini maghatag kanila’g lisensiya pag-abusar.