Ngano ug unsa

Gikan sa atong pagkamatngon og kabuot, o kaha diha sa pagbaton og maayong panghunahuna, kun kini pay gimatuto kanato, nga kanunay nga nag-usisa o nag-imbistiga, ngano ug unsa. Tingali dili kita masugamak sa kinabuhing pulos pamasin ug panaghap. Kay matugkad na man ang kaalam sa kinabuhi nga atong padulngan. Tungod kay makuryoso man kita sa tubag sa atong pangutana. Ang atong kinabuhi pulos talinghaga nga kinahanglan atong suhiron pag-ayo ang mga rekisitos nga mabatonan ang ligdong nga hiyas sa atong pagkatawo. Wala na kita’y kapilian aron pagtuman sa buot natong mahitabo ning kinabuhia. Kay mag-agad na man kini sa aktuwal nga situwasyon nga ato nang naandan. Magdepende pud kini sa kalihokan diha sa atong namat-an nga katilingbanon nga kalihokan, diin atong ipahaom ang mga paagi nga mahimo kitang epektibo sa pakiglambigit sa isi’g katawo. Aron sila himuong instrument sa pag-angat sa kalamboan sa atong tingusbawan. Angay makighugoy nila aron kita respetohan.

Kun eksperto na kita mokilatis o makamao na mo sayaw sa mga tawo nga may sukwahe nga paglantaw sa kinabuhi, dili na suliran ang pagtambayayong sa mga gumonhap o pagsulay nga mosungog sa atong pakigbisog. Aduna na kita’y determinasyon sa pagnunot nga higpit sa palimbasug aron kita modaug.  Bisan makita pa nato sa unahan ang hilabihang kadulom sa padulngan, apan nasayud kita nga kadto hadla lamang aron motalaw nga mawad-a’g kusog nga molahutay pa. Kay nasuheto na kita kun unsaon pagsubay ang tunob paingon sa damgo o pangandoy aron anihon o dawaton ang ganti nga kalamposan.

Kinahanglan nga matag gutlo angay kita magtuon, aron unsa may motumaw nga kakulian, kun kini man motipas sa padulngan, madali ra kini maremedyohan. Nga itul-id tumong sa dapit diin tua na naghulat ang katumanan sa atong mga gipangandoy. Permi positibo, ayaw tugoti ang imposible maoy makapatalaw nato. Busa magpakabana kita nga kanunay kuryoso diha sa mga palibot, nga magpakisusi sa kaugalingon ngano ug unsa na, karon ang mga bag-ong kaugmaran. Ablihan ang kaisipan nga dili madehado o matibhangan ang gipunting nga kaseguroan, ang mga giplano nga programa sa kinabuhi, angay gyud nga matuman. Di mag-agad nga makontento na lang, bisa’g sakit sa buot.