Gipiyestahan sa tanan ang talagsaong pagpangasaba sa usa ka pari ngadto sa usa ka single mother sa dihang nagpabunyag kini sa iyang anak didto sa dakbayan sa Mandaue sa niagi nga Domingo.
Ambot kun unsay nasulod sa ulo ni Padre Romeo Obach. Mas lupig pa niya ang automatic rifle sa kapaspas sa buga’g kalayo sa iyang baba nga nakapakaging sa 17 anyos nga inahan sa bata ug sa tanan nga naminaw.
In fairness ni Padre Obach, tulin pa sa alas kuwatro ang iyang pagpangayo og pasaylo ngadto sa batan-ong inahan ug sa tanang naapektohan. Human sa maong insidente, iya dayon kuno’ng nahunahunaan ang iyang sayop.
Busa, sa walay langan, dali ra nga nakahimo og apology si Padre Obach. Kini sa tuyo siguro nga mohugpa ang makabungol nga kalagot sa katawhan nga naglanog-lanog sa hawanan sa mainstream ug social media.
Mismo ang kongregasyon ni Padre Obach ang nagkapuliki usab og panagang sa mga batikos batok kaniya. Walay dudang naapektuhan usab kini niining bag-ong kontrobersiya nga mihapak karon sa simbahan.
Apan ulahi na ang tanan. Bisan pa sa iyang kaabtik pagpangayo og pasaylo, mikatap na sa Facebook ug ubang klase sa social media ang iyang grabe nga kasaba ngadto sa maong inahan.
Hinuon expected usab nga mapasaylo siya sa maong batan-on ug sa pamilya niini. Dili na lamang siguro gusto og gubot ang iyang pamilya tungod sa ka dako sa inpluwensiya ni Padre Obach sa komunidad.
Apan mas maayong napagya kining maong kontrobersiya sa media. Kini aron nga mabulgar usab kining maong klase sa isyu sa mga abusado’ng kaparian. Ug aron usab nga makorehian kini sa kadagkoan sa simbahan.
Dili ikalimod nga adunay mga pari ang grabe usab nga maka-abuso sa ilang pagserbisyo ngadto sa katawhan. Tungod lagi kay silay hawod sa mga simbahan, wala gyuy magpanuko sa mga parokyano pagyagyag sa ilang salawayong binuhatan.
Gani subong palandungon nga usahay tak-om ang baba sa kadagkoan sa simbahan sa mga anomaliya nga gikalambigitan sa ubang kaparian. Mahadlok siguro sila basin kun moribenta unya ang katawhan.