Klaro nga nayabag na ang dagan sa dakong kontrobersiya sa giingong pagplaster sa baba sa pipila ka puya nga gikalambigitan sa mga nurse sa Cebu Puericulture Center and Maternity House ning dakbayan sa Sugbo.
Nawala na ang sentro sa maong isyu, nga mao ang pagtabon sa baba sa mga bata ug ang pagka-ilegal niini. Nawala na ang dakong importanteng bahin sa maong kontrobersiya, nga mao kun unsa ka dako ang tulubagon sa maong mga nurse ug0 sa maong hospital.
Karon, ang maong kontrobersiya misimang na ngadto sa kinsay nagsulti sa tinuod: ang kampo ba sa hospital o ang habig sa unang ginikanan nga nangita’g hustisya sa binuang nga gidangatan sa ilang puya.
Matud sa kampo sa hospital, adunay settlement agreement ang nakab-ot tali niini ug sa ginikanan ni baby Yohannes. Sa maong settlement, adunay salapi nga tabang kuno alang sa inahan sa bata.
Apan kusganong gihimakak sa mga ginikanan ni baby Johannes nga nakig-settle sila uban sa maong hospital. Ila gayud kuno nga pangitaon ang hustisya sa dili maayong pagtratar sa ilang anak sa maong hospital.
Hinuon mipakita usab og mga ebidensiya ang kampo sa maternity house. Kabahin sa settlement agreement, adunay pa kunoy P15,000 nga alang sa inahan ni baby Yohannes isip financial assistance.
Naunsa na hinuon kini. Nag-iyahay na hinuon sila og paugat kun si kinsay nagsulti sa tinuod. Ang ilang tinubagay wala gyuy labot sa tinuod nga isyu, nga angay bang manubag ang mga nurse ug ang hospital sa maong kontrobersiya.
Hangtud nga naglibog na ang publiko. Kini tungod kay niabot na sa punto nga puro alegasyon na ang migula sa matag baba sa isig ka kampo. Ug kun si kinsay nagsulti sa tinuod mao na hinuon ang unod sa mga balita karon.
Ang sentro sa maong kontrobersiya mao nga tinuod ba nga miplaster sa baba sa mga puya ang mga nurse sa maong hospital. Apan subo nga palandungon nga natabonan na hinuon kini.
Ug daghan ang nahadlok nga basin unya nga dili na hinuon mogawas ang kamatuoran niining maong kontrobersiya.