Gihasol og daghang anomaliya ang unang termino ni Mayor Johny V. Delos Reyes sa pagdumala sa dakbayan sa Talisay ug tugoti nga akong iladlad dinhi ang pipila niini.
Una, ang surveillance camera nga nagkantidad og sobra sa P3 ka milyon nga wala mapahimusli ang katuyoan niini. Ikaduha, mao ang pagpaayo sa mga sakyanan nga iya sa dakbayan nga migasto og P7 milyones.
Ikatulo mao ang mga lingkoranan nga gipalit sa kantidad nga kapin sa P2 milyones nga dili nimo makit-an kay “ghost” nga proyekto sigun sa report sa Commission on Audit.
Kining maong mga anomaliya milutaw human milingkod si JVR pagka mayor sa dakbayan sa Talisay.
Apan sa akong tulomanon sa radyo kaniadtong Sabado sa gabii, giklaro ni JVR nga ang uban nga mga anomaliya nga gireport sa COA wala mahitabo sa iyang administrasyon kun dili iya kini sa administrasyon pa ni kanhi mayor Soc Fernandez nga konsehal na karon sa Talisay.
Gipabuhagay ni JVR ang iyang mga kahiubos sa ubang sakop sa media tungod kay matud niya wala nila kini ipasabot pag-ayo sa publiko hinungdan nga ang mga tawo nagtoo nga ang mga anomaliya nahitabo panahon lang sa iyang administrasyon.
Apan ang mayor miklaro nga bisan og siya nahiubos sa mga sakop sa media iya ra gihapon sila nga gisabot.
Kun ang mga anomaliya nga atong nahisgotan dinhi iya pa diay sa administrasyon ni mayor Soc Fernandez, nasayop diay ko sa akong pagtoo nga limpyo ang iyang administrasyon.
Kay kun may limpyo man dili diay ang pagpadagan ni mayor Soc Fernandez sa iyang kagamhanan kun dili ang pagtago diay sa mga anomaliya nga iyang gisudlan.