Kun tinuod man nga ang mikatap karon nga bingo machines diha sa kabarangayan sa dakbayan sa Sugbo maisip nga kahimanan sa sugal, ang kapolisan dili angay’ng magkyugpos lang niini.
Gihulagway nga kini’ng bingo machines susama ra og resulta niadtong video karera ug moli-moli kay kadto’ng moduwa niini’ng bingo machines mohulog gihapon og piso.
Dayon, kunohay mohatag usab og “debedendo” panagsa ang bingo machines aron pagpaikag sa mga moduwa ug dili moundang kun dako na og pilde. Kay gipaspasan man kaniadto ang pagpangsakmit sa mga video karera ug moli-moli, ang mga operators nangita’g laing paagi.
Tuod, nakombinsir nila ang kadagkoan sa Cebu City Hall nga hatagan og permit kini’ng mao nga mga bingo machines kay lagi dili kuno kini usa ka matang sa sugal.
Apan ang kapolisan mitataw g’yud nga ang bingo machines susama ra og epekto sa video karera ug moli-moli. Angay’ng mohimo og lakang ang kapolisan pinaagi sa pagrekomendar sa City Hall nga irebokar ang permit niini’ng mga bingo machines.
Dako’ng sayop ang gihimo sa kapolisan nga magkyugpos na lang abi kay giisyohan man og permit sa City Hall ang mga bingo machines. Posible nga wala masayod ang kadagkoan sa City Hall nga ang gitawag og bingo machines usa ka matang sa sugal.
Ang Republic Act 8551, Section 63, mihatag og dako’ng tahas sa mga mayor pagsumpo sa illegal nga sugal sa iyang teritoryo. “The control and supervision of anti-gambling operations shall be within the jurisdiction of local government executives.”