Nagsugod na ang tinguwan, bisan pa man og umaabot na ang El Niño nga masinati karong buwan sa Agosto hangtud sa sunod tuig, apan di kini makapugong sa pag-abot sa tinguwan.
Nakatilaw na usab og grabeng pagbaha ang Cebu City sa miaging semana, duna pay umaabot nga mga ulan ug bagyo hangtud sa buwan sa Pebrero sa sunod tuig.
Ang pagbaha dili na bag-o sa mga taga Cebu City ug bisan na sa ubang mga siyudad sa Metro Cebu kay mao ra ni nga problemaha ang way kasulbaran bisan pila na ka mga mayor ang nangagi ug pila na ka mga regional directors sa Department of Public Works and Highways. Ang Philippine Atmospheric, Geophysical and Astronomical Services Administration sa Mactan miingon nga dili pa gyud andam ang Cebu City sa pag-abot sa tinguwan nga momugna og mga pagbaha.
Tinuod kini kay mismong si Mayor Michael Rama miangkon nga kuwang gyud ang mga kanal sa siyudad. Kun duna man pwerteng gagmaya ug wala’y atiman.
Kining mga kanal nga proyekto sa DPWH kang kinsa man diay responsibilidad ang pagpanghabwa sa mga hugaw ug nabara nga basura, ang mga local nga kagamhanan o ang DPWH gihapon?
Sa kadaghan sa mga gagmay nga mga kanal, dili naman maato og limpyo, kuwangon ang panahon sa ting-init aron maandam ang pag-abot sa tinguwan.
Ang nag-antos niini nga sistema mao ang mga magbubuhis. Ang pagtuloranay kung kinsay manglimpyo maoy hinungdan nga nangaguba kini. Kun duna may balaod kabahin niini, mas maayo nga wagtangon kini ug itahas na sa LGUs ang paglimpyo aning mga government-initiated drainage projects.