EDITORYAL - Kabalaka pagbalik sa mga Amerkano

Nunot niining bag-ong kasabotan military tali sa Pilipinas ug Amerika, subli na usab naukay ang mga kaagi sa mga Filipino dihang nia pa ang U.S. bases ug ang gibilin niining problema sa dihang namiya sila niadtong dekada 90.

Usa na niini ang isyu kabahin sa mga Amerasians o mga Filipino-Americans kansang mga amahan mga US servicemen gikan sa U.S. Navy ug U.S. Air Force.

Base sa uwahing pagtuon sa Philippine Amerasian Research Center niadtong 2012 dunay 250,000 ka mga Amerasians dinhi sa Pilipinas. Mga anak sila sa Amerikanong sundalo nga giabandonar human sa pagbiya sa Amerika sa Pilipinas.

Karon, subli na usab nabuhi ang kabalaka nga basin og maparehas na usab kini kaniadto ang bag-ohay lang nauyonang Enhance Defense Cooperation Agreement (EDCA) tali sa Pilipinas ug Amerika.

Lisod  pag-monitor ug pagkontrol sa gobiyerno o ni bisan kinsa ang ingon ani nga mga sitwasyon kung magkagustohay ang babaye ug lalaki ug magbunga ang maong relasyon.

Ang bugtong mahimo lang gyud aron di masubli ang maong problema mao ang hustong paggiya sa pamilya ngadto sa ilang mga anak. Ug labaw sa tanan hustong edukasyon sa atong kababayen-an.

Edukasyon nga mamahimo nilang gamiton aron sila makabaton og desenteng trabaho ug dili basta magpailad sa mga langyaw ug kun sa higayon nga sila maangkan duna gihapon silay ikabuhi sa ilang mga anak nga Amerasians inay nga mamahimo silang labad sa ulo sa katilingban.

Nasayran nga kadaghanan sa maong mga Amerasians karon dinhi sa Pilipinas nalakip sa mga kabus kaayong pamilya sa katilingban.