Ang hukmanan maoy dangpan sa mga dinaogdaog. Kun may gilugos o gipatay, ikiha dayon ang nanglugos o nagpatay aron makab-ot ang hustisya. Apan subo kaayong palandungon nga bisa’g klaro na ang mga ebidensiya batok sa kriminal, ang kaso molungtad pa’g pila ka tuig, ayha pa mopakanaog sa pinaleng hukom ang huwes.
Labi na’g adunahan ang gikiha sa kabos. Sa pagpangligid sa mga adlaw, lupigon gyud ang pobre sa lahutay. Hangtod sa pagpanglabay sa katuigan, diin ang imbestigasyon gisigehan la’g lugway, daw patas-anay sa bakos. Hangtod nga sa kadugayan, ang sad-an mao pay modaog. Ngano man? Unsa man diay ang mas bug-at sa hukmanan: Ang luha sa matinud-anong timawa, o ang binandol nga salapi sa bakakong adunahan?
May mga senador nga gipangkiha’g plunder. 2012 pa apan hangtod karon ang imbestigasyon nagpadayon. Nganong dugay ni nahuman? Tungod kay ang pagpamakak man maoy ilang gimaster ug dili ang ka-honest sa ilang pagkatawo.
Ibutang nato nga dili tinuod ang giyagyag nga mga ebidensiya ni Benhur Luy ug sa ubang whistleblowers. Nganong dili man nila kini sila sumbalikon sa pagkiha aron maoy mapriso? Nganong dili man makadulot ang mga nahilambigit nga senador niining mga tawo, kinsa wa nay kahadlok mobuhis sa ilang kinabuhi bugti sa hustisya nga gisinggit sa katawhan?
Kay kun honest pa lamang kining atong mga Senador, kun ang gusto pa lang sa Ginoo maoy gihimo nilang sumbanan diha sa ilang pagpangalagad, dali ra unta kaayo masulbad ning kasoha, uy! Pero nilang tanan nga giakusar, kinsa ba ang miangkon dayon? Haskang gahia patanduon! Unsaon, ang pagpamakak man maoy ilang kinaon.