Dear Atty. Divine,
Duna lang unta ko’y ipangutana kabahin sa akong pag-guarantor sa utang. Ang ako nga kauban sa trabaho nangutang sa lending. Ako ang nagsilbi’ng guarantor. Pag-abot sa panahon nga tingbayad na wala siya makabayad ug mi-issue siya og cheke. Miabot na lang og usa ka tuig wa gihapon niya mabayri ang utang ug ang cheke nga iyang gi-issue miuntol. Miundang na ang akong kauban sa trabaho busa ako ang gipaningil sa lending. Ila ko nga gihulga nga ikiha tungod sa pag-untol sa cheke kun dili ko makabayad sa utang sa akong kauban. Ang akong pangutana attorney, isip guarantor sa utang maapil ba ko sa pagkiha tungod sa pag-untol sa cheke nga iyang gi-issue? Mapugos ba ko sa lending company sa pagpabayad sa maong utang nga kun buot huna-hunaon dili man ako’y utangan? Hinaut nga imo kong tabangan sa akong problema. ---Erica
Dear Erica,
Kun mountol ang cheke nga gi-issue sa usa ka tawo, duha ka kaso ang mamahimong atubangon sa nag-issue niini: Estafa ug kalapasan sa BP 22. Ang tawo nga nag-issue sa cheke maoy makiha busa ikaw isip guarantor wa kay angay nga kabalak-an. Kadtong imong kauban nga nag-issue sa cheke mao ray mapasakaan og kaso. Samtang kalabot sa imong pagka guarantor, ang buot ipasabot niana nga ikaw migarantiya sa lending company nga giutangan sa imong kauban nga in case dili siya makabayad sa iyang gihuwam, ikaw ang mobayad niini, hinungdan nga sa dihang napakyas ang imong kauban sa pagbayad ikaw ang gipaninglan sa lending.Hinuon basi sa atong balaod, ang guarantor magukod lang sa pagpabayad sa utang kun gihimo na sa creditor ang tanan aron siya mabayran sa principal debtor sama sa paggukod sa iyang mga properties ug uban pang pamaagi apan bisan pa niini’ng tanan wa gihapon siya kabayri sa kinatibuk-an nga kantidad, then mamahimo na niyang paninglan ang guarantor. Ang maayo nimo nga buhaton karon mao ang pagpakigsulti sa imong kauban nga nangutang sa pagbayad na niini aron dili ka maapil sa iyang problema, imo ‘sab nga sultian ang lending company nga imo sila’ng tabangan sa pagpaningil sa imong kauban nga utangan aron di ka maangin sa iyang obligasyon. Hinaut nga akong natubag ang imong mga pangutana. Thanks and God Bless. - Atty. Divine
Kun ikaw adunay problemang legal, ipadala lang ang imong pangutana sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana matag Miyerkules ug Domingo pinaagi sa akong column.