Suporta sa bana, gusto’ng bawion sa asawa

Dear Atty. Divine,

Usa ako ka registered nurse nga nagtrabaho sa America. Ang akong bana maoy nagbantay sa among anak nga 5-anyos diri sa Pilipinas. Nag-abang ko og balay alang kanila nga duol ra sa eskwelahan sa bata ug matag buwan akong gisuportahan ang akong bana ug ang akong anak. Karon, sa akong pag-uli mao na lay akong nahibaw-an nga aduna diay laing babaye ang akong bana. Sa akong kalagot gikuha nako ang among anak ug anaa karon sa akong mama kay hapit na man ‘sab ko mobalik sa gawas. Ang akong pangutana attorney kun mahimo ba nako nga mapaningil ang akong bana sa akong gihatag kaniya nga suporta? Mahimo ba ‘sab ko nga mangayo og suporta sa akong bana alang sa among anak karon nga wala na kaniya ang bata? Hinaot nga imong matubag ang akong pangutana. -- Cleofe

Dear Cleofe,

Ubos sa atong balaod, ang bana ug asawa obligado pagsuporta sa usa’g usa base sa Art. 66 sa atong Family Code. Gawas niini, obligado ‘sab ang magtiayon nga mosuporta sa ilang anak nga naglakip sa matag adlaw nga panginahanglan, education, medicine, pinuy-anan, senina ug transportasyon base usab sa Art. 195 ug Art. 194  sa Family Code. Sa ato pa, kun ang pagsuporta nimo sa imong bana ug anak naggumikan kay wa siya’y paningabuhian niadto’ng higayon ug wa siya’y kapasidad  pagsuporta sa iyang kaugalingon ug sa inyong anak then way basihan ang imong pagpaningil kaniya tungod kay kabahin man kini sa imong obligasyon. Karon nga gikuha na nimo ang imong anak, mamahimo ka nga mangayo og suporta kaniya alang sa inyong anak pinaagi sa pagpadala kaniya og demand letter. Kun magmagahe siya sa pagboluntaryo paghatag og suporta, mahimo ka nga modangop sa korte pinaagi sa pag-file og Petition alang sa maong katuyoan. Hinaut nga akong natubag ang imong pangutana. Thanks and God Bless. -- Atty. Divine

Kun ikaw adunay pangutana, ipadala lang sa Legal Corner sa Banat News sa V. Gullas St., Cebu City, or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.