Miabot na gayud sa Sandiganbayan ang kaso nga Plunder ug Graft and Corruption nga gipasaka batok nilang Senador Jinggoy Estrada, Bong Revilla Jr., Juan Ponce-Enrile ug negosyante’ng si Janet Lim-Napoles.
Sigun sa proseso, human unya sa pagbola sa kaso aron pagpili kun asa nga division sa Sandiganbayan kini husayon, mosunod dayon ang pagpagawas sa warrant of arrest alang sa pagdakop sa nahisgotang mga akusado.
Dili angayang ikaguol sa mga akusado ang pag-abot na sa ilang kaso sa Sandiganbayan tungod kay sa nahisgotang hukmanan patas nila nga mapanalipdan ang ilang kaugalingon ug pamatud-an kun tinuod ba sila nga inosente.
Wala pa kini labot sa posible nga paglangan-langan unya sa pagpakanaug sa hukom sa Sandiganbayan aron pagsiguro nga pabor sa mga akusado ang desisyon.
Sa Pilipinas, milagro kun ang hukmanan makapakanaug dayon sa iyang hukom sulod sa pila lang ka tuig. Sama sa kaso nila ni Mayor Cynthia Moreno sa Aloguinsan ug mga sakop sa Bids and Awards Committee sa ilang lungsod nga gikonbikto sa Sandiganbayan paglabay na sa pito ka tuig.
Mao kini ang hinungdan ngano’ng wala mabalaka ang mga gipangkasohan nga mga senador kay segurado sila nga malangay ang ilang kaso ug posible nga unya na kini mahuman sa laing administrasyon nga duol sa ilang dughan.
Busa pabor kini kanila tungod kay mas palabihon pa sa mga akusado’ng senador nga mapriso sila og dugay pero haruhay, kay sa makonbikto dayon ug lisud-lisuron sa kasamtangang administrasyon. (gerryauxilio@yahoo.com.)