EDITORYAL - Nganong may AK-47s ang NPA

Dise-nuwebe na ka police officials ang nalambigit karon sa lain na usab nga anomaliya. Ug ning panahona, armas na usab nga napunta sa mga kamot sa mga rebeldeng New People’s Army (NPA). Sa wala pa kini ma-trace sa Criminal Investigation and Detection Group, pila na  ba kaha ka mga kinabuhi sa kapolisan, kasundaluhan ug mga sibilyan ang nausik tungod niining mga armasa.

Matud pa sa imbestigasyon dunay 1,004 ka  AK-47 Rifles ang na-missing ug karon nasuta nga anaa na kini karon sa mga piniling mga rebeldeng NPA nga nagpadayong naghamok sa kahapsay, kalinaw ug kalamboan sa nasud.

Ang maong mga AK-47s sumala pa gikan sa China. Legal nga gi-import dinhi nga alang kuno sa mga security agencies nga nagbantay sa mga minahan.

Apan sa nangaging mga engkwentro tali sa mga militar ug NPA dunay pipila niini ang na-recover sa encounter sites, butang nga nakapahingangha sa militar ug nakapaalarma kun nganong dunay mga brand new AK-47s ang mga rebelde.

Ang mas nakapakurat kay na-trace kini nga mga lisensyadong armas ug base sa mga ebidensya mao kini ang mga AK-47s nga giisyu ngadto sa security agencies.

Nagpakita kini sa kasayon diay ilaron sa atong firearms licensing system. Wa bay follow-up kun gigamit ba gyud kini sa mga security agencies ug kun nagpabilin pa ba gihapon kini sa tukma nga ahensya.

Ang mga giakusahang mga PNP officials pulos kusganong mihimakak sa maong mga pasangil. Apan angay pud sigurong gukdon kadtong security agencies nga maoy nag-import ug nagpalisensya sa maong mga armas.