Wala’y armas ang mga nagbantay sa Kapitolyo ug ubang mga opisina nga gipanag-iya niini. Nagsugod kini kaniadtong adlaw nga Domingo, Hunyo 1 human mipuli ang Blackpearl Security Agency isip bag-ong tigbantay sa Kapitolyo.
Sigun sa balita, ang mga guwardiya nga nagbantay sa Kapitolyo, South Bus Terminal ug Larsian nagtakin lamang og sakoban sa armas. Bisan ang guwardiya nga nagbantay sa opisina ni Bise Gobernador Agnes Magpale wala usa’y armas.
Hinuon nasudlan ra gayud og armas ang sakoban niini human moreklamo ang opisina sa bise gobernador.
Pagkasayod sa gobernador iyang gipasalig nga susihon niya ang isyu apan mitataw nga aduna sila’y kaugalingong security force ug mga polis nga nagbantay sa Kapitolyo ug ubang mga opisina niini.
Kun mao kini, wala na diay kinahanglana pa sa Kapitolyo ang security guard kay aduna man diay sila’y security force ug polis nga nagbantay?
Unsa pa may pulos sa mga security guard? Nagdugang lang sila sa gastohanan sa Kapitolyo. Kun wagtangon ang private security guards makadaginot pa ang Kapitolyo og salapi ug ang madaginot magamit pa kini sa mas gikinahanglan nga serbisyo.
Ngano ba tuod nga mao may gipabantay sa Kapitolyo ang mga guwardiya nga walay mga armas? Unsaon man tawon nila pagsukol kun atakihon sila sa mga dautang tawo nga armado nga mosulod sa Kapitolyo ug sa ubang buhatan niini?
Seguro nagsalig ang Blackpearl Security Agency sa security force ug polis sa Kapitolyo nga mga armado. O ba kaha, ang mga guwardiya nga gipabantay sa Kapitolyo may mga kumo nga sama sa kang Pakman ug mga tiil nga sama sa kang Jacky Chan mao nga wala na kinahanglana nila ang mga armas.
Alkanse usab ang Kapitolyo nga mobayad og dako nga kantidad nga gilatid sa kontrata pagkuha og guwardiya sa private security agency apan ang idestino nga gwardiya wala’y armas.