Uban nga polis tapolan

Ang pagkasikop sa idlas kaayo nga si Manuel Richard Corominas nga naila sa iyang angga nga Patsoy, nagmatuod nga kun molihok lang ang kapolisan madakpan g’yud ang mga dakponon.  Daghan kaayo nga mga ilado’ng wanted kay nag-atubang og kaso sa hukmanan sama ni cult lider Ruben Ecleo nga hangtod karon nagpabilin nga gawasnon.

Ang mga rason niini nga wala madakpi si Ecleo mao nga wala mangita ang kapolisan kaniya. Pagkadaghan nga inantigo’ng paagi aron matultolan si Ecleo.

Nakahinumdom ba kamo nga ang labing wanted nga terorista sa kalibutan nadakpan g’yud sa mga sakop sa Central Intelligence Agency (CIA) nga nagtago duol pa sa kampo sa militar?

Tungod kini kay ang mga sakop sa CIA wala gayud moundang pagpangita sa gitagoan sa ilang dakponon nga lider sa mga terorista. Resulta, ila kini nga nadakpan.

Dinhi sa nasud, ang Philippine National Police (PNP) adunay gimugna nga Task Force Tugis nga gitahasan nga mogukod sa mga most wanted criminals, apan menos kaayo og kalampusan.

Pinaagi sa moderno’ng kahimanan karong panahona sama sa cellphones, dali ra kaayo matultolan ang usa ka tawo. Ayaw ko’g ingna nga si Ecleo walay cellphones?

Kadto’ng ilado nga terorista nga napatay sa mga sakop sa CIA natultolan nila pinaagi sa iyang mga e-mail nga gipadala sa mga higala.

Dili na kinahanglan nga idetalyi nako pag-ayo kun unsaon pagtrabaho niini kay nasayod ko nga makamao niini ang atong mga polis. Ang nakaapan lang kay wala nila himoa.Diha’ng commander pa kaniadto sa Cebu Metrodiscom si Lt. Col. Panfilo Lacson, swerte ako kay diha’y higayon nga iya ko nga nahatagan og mga ideya.

Suheto mohimo’g follow-up operations si Lacson kay sagad sa iyang mga assignment diha g’yud sa intelligence section. Hepe si Lacson kaniadto sa Metropolitan Command sa Manila.

Diha nga hepe si Lacson sa Task Force Habagat sa Presidential Anti-Organized Crime Task Force (PAOCTF), ang iyang grupo maoy labing daghan og kalampusan.

Kini unta maoy himuon nga sumbanan sa kapolisan karong panahona. Dili kay magyampungad lang sila kanunay sa mga police stations ug kun mosuroy man gani walay tumong.   Apan klarohon nako nga dili tanang polis ang ingon niini og batasan, apan duna g’yuy uban nga tapolan.