Sonny mas mat-an pa’s pinya

Nasakripisyo og pila ka adlaw ang serbisyo sa kagamhanan sa dakbayan sa Toledo tungod sa pamolitika. Ang balay-lungsod sa dakbayan sa Toledo giputlan og kuryente sa CEBECO tungod kay wala kini makabayad sa ilang bayranan nga miabot og P1.3 ka milyon.

Gawas sa balay-lungsod, giputlan usab og kuryente ang opisina sa mga polis, wala usab mahakot ang mga basura sa dakbayan ug halos tanang serbisyo paralisado. Kining tanan maoy resulta sa pamolitika sa pagpalabang sa 2014 nga annual budget nga gipugngan sa hukmanan tungod sa kakuwang og quorum dihang gipasar kini sa konseho.

Sa dakbayan sa Toledo, kadaghanan sa mga konsehal alyado sa oposisyon nga One Cebu ug pipila lang ang mga konsehal nga dumadapig sa administrasyon ni Mayor Sonny Osmeña busa gipahimudsan sa oposisyon ang ilang gidaghanon. Ang oposisyon nga mga konsehal magpuli-puli pagtambong sa session ug giseguro nila nga bisan sa ilang pagtunga wala gihapo’y quorum aron dili mapalabang ang gisugyot nga P619 milyones nga Appropriation Ordinance nga maoy magtugot sa kagamhanan sa Toledo pagpagawas sa mao nga kantidad gikan sa panudlanan aron magamit sa operational expenses.

Apan bisan pa man sa gihimo sa konsehal sa oposisyon, napasar gihapon ang Appropriation Ordinance. Kun giunsa, si Mayor Sonny Osmeña lang ug Bise Mayor Jeffrey Yapha ang nasayod.

Ang mga konsehal nga sakop sa oposisyon nakalimot nga ang ilang ikaatubang mao ang tang-an sa politika nga si Mayor Sonny Osmeña. Nakalimot sila nga si Sonny mas mat-an pa sa pinya. Kun na manok pa, tadhan na sa politika. Sa salida pa’ng Fernando Poe Jr. paingon pa lang kamo, pabalik na siya. Aron basulon sa mga taga Toledo ang mga konsehal nga sakop sa oposisyon, wala i-reenact ni Mayor Sonny ang budget sa tuig 2013. Sigun sa balaud, kun ang budget sa kasamtangang tuig wala pa mapalabang o gi-question ang legalidad niini mahimo nga ma re-enact ang budget sa miaging tuig aron mentras tanto magamit kini sa operational expenses sa kasamtangang tuig.

Wala kini himoa sa mayor busa paralisado ang serbisyo sa kagamhanan sa Toledo. Mao kini ang resulta kun sa piniliay maoy atong pilion ang politiko tungod kay bisan og humana ang eleksyon magsige gihapon og away ug magpadayon gihapon sa ilang pagpangampanya. Mao na nga sa sunod, ayaw na kamo pili og politiko. Pilia ninyo ang mga tinud-anay nga lider nga ang kasingkasing ang katawhan maoy una.