Dear Atty. Divine,
Duna unta ko’y pangutana labot sa luna nga akong gipuy-an. Kining balay nga akong gipuy-an, napalit ni nako apan way labot ang yuta kay laing tawo man ang tag-iya sa luna. Miabot mi og 60 ka pamilya ang nagpuyo niini’ng maong luna. Apan kining akong silingan nangangkon karon nga iyang apuhan kuno ang tag-iya sa yuta nga among gipuy-an og gani naa kuno sila’y mother title niini apan ang among nahibaw-an lain man ang tag-iya niini’ng yutaa. Ang akong pangutana kun may katungod ba ang akong silingan nga mopaibot sa akong balay? Unsay akong buhaton nga sigehan man ko og away aning akong silingan ug hapit na mapupos ang akong pasensya kaniya? Mamahimo ba diay nga papahawon ko ug way labot ang uban nga pareha man kami nga squatter aning yutaa? Hinaut nga imo kong matambagan sa akong problema. -- Roel
Dear Roel,
Kun dili makapakita og ebidensya ang imong silingan sama sa original nga titulo sa yuta nga inyo’ng gipuy-an ug pulos lang ang iya pangangkon, buot ipasabot nga wala pay kasiguroan kun sila ba g’yud ang tag-iya. Busa kay dili pa man klaro kun kinsa’y matuod nga tag-iya sa yuta, then wala’y katungod ang imong silingan nga mopaibot sa imong balay. Kun sigehan ka og away sa imong silingan mas maayo nga imo kining ireklamo sa barangay aron adto kamo mag-atubang. Ayaw lang sakyi na’ng iyang pagpangaway kanimo aron dili modako ang inyong problema. Apan kun pananglitan mapamatud-an g’yud nga ang imong silingan ang tag-iya sa yuta nga imong gipuy-an unya iya ka nga papahawaon, mamahimo ‘sab ka nga modangop sa barangay aron mangayo kanila og tabang nga kapugngan ang pagpapahawa kanimo. Usa sa imong isugyot sa tag-iya nga imong paliton ang luna nga imong gipuy-an o imong abangan. Hinaut nga akong natubag ang imong mga pangutana. Thanks and God Bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana matag adlaw’ng Miyerkules ug Domingo pinaagi sa akong column.