Back to school na ugma puhon, ang mga tinun-an sa pampublikong eskwelahan ug dungan sa ilang pagbalik sa klase ang pagbalik na usab sa mga nagkalainlaing problema sa edukasyon.
Una, ang kakuwang sa classrooms. Magpunsisok na pud ang mga estudyante o di ba kaha magklase na lang sa gawas sa eskwelahan tungod sa kakuwang sa mga classrooms. Gani, giplanohan na ni Department of Education – 7 regional director Carmelita Dulangon nga mag 3-day school week sa mga lugar nga gikuso-kuso sa super typhoon Yolanda nga hangtod karon, wala pa gihapon ma-ayo ang mga eskwelahan. Samot na siguro ang problema sa mga lugar nga gilinog!
Ikaduha, kakuwang sa magtutudlo. Aduna kuno’y mga bag-ong magtutudlo nga gipangdawat ang DepEd aron masulbad ang kakuwang sa mga titser. Makita ra unya ni nato ugma kung ang mga gipangdawat igo ba aron matubag kining problemaha. Kung dili, aw mag-shifting na usab sila ni ma’am aron maklasehan ang tanan.
Ikatulo, kakuwang sa gamit. Tungod kay ubay-ubay man ang mga tinun-an, magkuwang na usab ang mga gamit sa eskwelahan sama sa lingkuranan, lamesa ug mga libro.
Gani, duna na’y reklamo nga kuwang ug murag gidali-dali paghimo ang libro sa Grade 9.Kini nga mga problemaha nagsige na lang og balik-balik. Kada Hunyo, kada abli sa klase. Apan bisan pa og kanunay na lang nato ni sila masinati, wa ra gihapo’y kasulbaran kini. Kanus-a pa kaha makaamgo ang naa sa kagamhanan nga nagkinahanglan sa ilang pagtagad ang edukasyon.