Libre’ng syringe sa mga adik

Husto g’yud kaayo ang gihimo sa mga sakop sa Cebu City Anti-Drug Abuse Council (CADAC) kay gipahunong nila ang pagpanghatag og libre nga mga syringe ngadto sa mga adik. Nindot baya ang tumong sa Cebu Plus kay gitumong kini nga hatagan nila og libre nga syringe ang mga adik sa ilegal nga drugas aron dili sila magbanus-banos sa paggamit og syringe.

Ang Cebu Plus igo lang nga gigamit sa Department of Health (DOH) nga maoy mohatag sa mga libre nga syringe sa mga adik, kay  mauwaw tingali mohimo ang DOH mao nga migamit sila og non-government organization.

Daghan man gud nga mga injecting drug users, kana ba nga mga adik nga mogamit na og mga injectable drugs sama sa Nubain. Matud pa nga dunay balay diha sa Barangay Kamagayan nga motunol ka lang sa kuwarta nga bayad unya ipasok ang imong bukton sa lungag, injection dayon.

Kataw-anan no? Ang kuyaw og makahilo nga kemikal ang isulod sa syringe ug maoy ituslok sa bukton sa adik. Maayo tingali no? Kaniadto, paspas ang kampanya batok sa mga namaligya og Nubain diha sa Barangay Kamagayan.

Ang hepe gud sa City Office for Substance-Abuse Prevention (COSAP) kaniadto mao man si Oscar Mabilog nga ang balay anaa ra usab sa Barangay Kamagayan. Daghan g’yud og inpormasyon si Mabilog.

Apan kun tinguhaon lang g’yud sa kapolisan, dali ra sila nga makakuha og inpormasyon kun kinsa kini’ng mga tawo nga namaligya og injectable drugs diha sa Kamagayan.

Ayaw ko’g ingna nga ang mga tanod ug opisyal sa Kamagayan wala masayod? Kun wala gani mo masayod ingnon nako kamo nga maayo lang mo sa “binahog.”

* * *

Gitug-anan ko sa akong kauban nga reporter sa Talisay nga undangon na kuno ni Talisay City Mayor Johny Delos Reyes ang grupo nga gibunyagan niya og Flying Squad.

Kun kini maoy himuon ni Mayor JVR, pagakpakan nako siya. Apan ngano’ng karon man lang nakahuna-huna si Mayor JVR niini? Human ba nato gisaway pag-ayo ang binuhatan sa iyang mga sakop nga “manglupad?”

Balikon nako, abusado kaayo ang mga sakop niini’ng Flying Squad sa Talisay. Nagsakay-sakay sila og patrol vehicle nga walay plate number sa luyo, ambot og narehestro ba ‘sab.  Ambot og nasuheto ba kaha ‘sab sa mga lagda nga gilatid sa Transportation and Traffic Code. Maayo ra nga bungkagon. Naa may traffic enforcers ang Talisay ug ngano nga maghimo pa man og Flying Squad?