Ang paghilak makaayo ba?
Sa nagsunod-sunod nga hulagway sa mga bata’ng bag-ong natawo sa usa ka maternity house kansang mga baba giwalwag og pacifier ug gibaatan og plaster ang mga ngabil aron dili na makahilak, nagpasabot nga kinaiya na kini sa maong paanakan.
Wala kita masayud kun kanus-a sila nagsugod sa mao nga practice. Nagtuo kita nga nasayud na niini ang tagdumala apan iya lang gipasagdan kay wala may mireklamo nga ginikanan ug wala pa man usa’y namatay nga bata.
Nagtuo man gud tingali ang tagdumala sa maternity house nga makaayo sa bata nga magpakahilom lang aron dili makadisturbo sa ubang kabataan ug sa mga nanagbati pa nga inahan. Unsa may makaon sa bata niana’ng pacifier? hangin?
Sa mga doktor ug uban pa nga suheto sa panglawas sa tawo, makaayo ba nga pugngan ang ato’ng kaugalingon nga dili mohilak bisan og kahilakon ka na?
Kun buot ka nga mohilak apan dili makagawas ang imong tingog kay gibangotan ang imong baba, makaayo ba kini kanimo?
Pananglit kun makaayo man, aw mao diay nga gisagop sa maong paanakan center ang pagsap-ong sa baba sa bata, apan kun dili man makaayo ngano nga ila man kini’ng gisagop nga practice?
* * *
Katunga sa gidaghanon sa mga piniriso sa Cebu City Jail, nag-atubang og kaso nga may labot sa gidili’ng drugas. Sila mga drug pushers ug users.
Tungod kini kay ang balaod naglatid nga dili mapiyansahan ang mga tawo nga madakpan nga namaligya og drugas bisan usa ka gamay kaayo nga putos, bisan gani abog sa shabu ang ibaligya.
Ang paggamit og gidili nga drugas popular na kaayo karon kay kun gusto ka nga mahimo’ng kriminal, mosuyop ka lang sa aso sa shabu.
Pinaagi niini, dali ka na kaayo nga mopatay, manglugos, manulis ug tanang krimen nga gusto nimo. Sayon ra ang pagbuhat sa krimen kay mawad-an ka man og maayo nga panghuna-huna.
Sa dili pa makahimo og krimen, angay gayud nga kini’ng mao nga mga adik panghiposon na ug bilanggoon aron nga dili na makaamong og mga tawo nga matarong.
- Latest
