Gusto sa negosyante’ng si Manny V. Pangilinan nga moapil sa pagdumala sa Cebu City Medical Center. Mao kini ang gitanyag sa negosyante sa ilang panagkita ni Mayor Mike Rama didto sa kaulohan.
Ang tanyag sa negosyante mihaum ug mitukma sa gipauso sa administrasyon ni Pangulong Noynoy Aquino nga Public Private Partnership (PPP).
Kun wala ko masayop, si Manny V. Pangilinan naglaraw usab unta pagpalit sa Cebu City Medical Center kaniadtong 2008 sa diha’ng ibaligya unta kini ni kanhi Mayor Tomas Osmeña.
Kun tinambanon nato sa pagsabot, ang Public Private Partnership moresulta ngadto sa semi-privatization sa usa ka government service institution.
Busa dili kini haum ug tukma sa tambalanan nga pagatukoron nga paganganlan unya og Peoples Hospital o tambalanan sa katawhan. Busa karon pa lang daan, ako na nga irehestro ang dako nako nga pagsupak sa maong tumong tungod kay kun mao kini ang sundon ikaduha na lamang unya ang serbisyo sa ospital ug ang mag una mao na ang negosyo.
Si Pangilinan negosyante busa ang anaa sa iyang utok mao nga moganansya siya sa iyang ibubo nga puhonan sa Cebu City Medical Center ug dili ang pagtabang sa mga nagmasakiton ug nalandig sa tambalanan.
Gani klaro kaayo sa iyang tanyag nga gawas sa pagtabang nga mapatukod ang bag-ong ospital sa dakbayan, gusto pa kini nga makaseguro nga mokita ang salapi nga iyang ipuhonan pinaagi sa pag-apil sa pagdumala sa tambalanan.
Dili ikalimod nga kapin sa usa ka bilyon ka pesos ang gikinahanglan sa kagamhanan sa dakbayan sa Sugbo aron mapabarog ang napulo ka andana nga tambalanan. Dili usab sayon ang pagpangita ug ang pagtigum niining maong kantidad pinaagi lamang sa piso nga imong gidonar.
Pero ako nga isugyot nga pabarugon lang g’yud ang tambalanan gikan sa donasyon sa mga matinabangon ug dili sa mga mapahimuslanon.