Kadto’ng tawo nga naluwas sa dugoon nga buy-bust operation sa dakbayan sa Lapu-Lapu kaniadto’ng miagi’ng semana mipasangil sa mga polis nga wala sila mohimo’g buy-bust operation.
Si Romulo Cabase nitawag sa akong tulumanon sa radyo kaniadto’ng Sabado sa gabii ug namasangil sa mga polis nga mitumo-tumo lang kuno kanila.
Matud ni Cabase nga samtang hinay nga nagdagan ang ilang sakyanan didto sa Barangay Looc, Lapu-Lapu mikalit lang og babag kanila ang tawo nga iyang gituohan nga nagdala og airgun ug mipaingon sa kilid sa ilang sakyanan, dayon gipusil ang ilang drayber.
Human sa pagpamusil, misunod dayon ang sunod-sunod nga buto-buto sa mga armas nga mipatay sa iyang duha ka kauban. Salamat na lang nga nakahupo kuno si Cabase sa iyang gilingkoran ug ang iyang tiil lang ang naigo.
Pwerte ang kalagot ni Cabase sa tawo nga iyang nailhan nga si PO3 Joseph Villamor diay tungod kay human sila pauwani og bala gitumban pa gayud ang iyang samad. Diha nga girekisa siya sa polis P6 ug ang iyang charger ra gayud kuno ang nakuha gikan kaniya ug wala nay lain pa. Iyang pangutana, unsaon man kuno nila pagpamusil sa mga polis nga wala man sila’y armas.
Ang argumento ni Cabase nga kun sila pa maoy una’ng namusil, ngano nga gihaylo man siya ni Senior Inspector Rogelio Pineda, hepe sa City Anti-Illegal Drugs Special Operation Task Group (CAIDSOTF) sa pag-angkon nga sila ang una’ng namusil aron siya tabangan?
Matud ni Cabase nga kun may naghimo og dautan dili siya kun dili si PO3 Villamor kay wala iuli ngadto kaniya ang iyang P6 ug charger sa iyang cellphone.
Si Cabase mitug-an nga misamot ang iyang kalagot ni PO3 Villamor ug Pineda kay samtang nagpaabot siya nga imbestigahon gikantahan pa siya og kanta sa patay nga pahulay sa dayon. Buyno, kun tinuod ang pasangil ni Cabase batok sa mga polis sa Lapu-Lapu mura’g dili maayo ang padulngan sa atong kampanya batok sa ginadiling drugas kay mabutang sa kompromiso niini ang katungod sa mata’g usa ug ang seguridad sa katawhan.
Samtang akong gisuportahan ang kampanya sa gobiyerno batok sa suliran sa drugas dili pud ako gusto nga mabutang sa peligro ug makompromiso ang seguridad sa katawhan. Lauman nako nga ipasubay lang sa balaod ang kampanya batok sa ginadili’ng drugas.