Bato nahimong kuwarta MCIA tax sa Lapu-Lapu

Sa katapusan, ang Mactan Cebu International Airport Authority (MCIAA) mihatag na g’yud og P88 milyones isip pasiunang bayad sa kinatibuk-ang P1.8 bilyones nga ilang bayranan nga buhis ngadto sa kagamhanan sa dakbayan sa Lapu-Lapu.

Si Mactan Airport General Manager Nigel Paul Villarete mao mismo ang nangunay pagtunol sa tseke ngadto sa tresurera sa Lapu-Lapu City isip  pasiuna’ng buhis sa airport.

Dugay ra unta’ng matagamtaman sa mga residente sa Lapu-Lapu ang maong buhis gikan sa MCIA, apan sulod sa dugay’ng katuigan gipugngan kini sa miaging mga tagdumala.

Mikiha ang kagamhanan sa dakbayan sa Lapu-Lapu bitbit ang argumento gikan sa kaso’ng nadesisyonan sa Korte Suprema nga ang mga government-owned and controlled corporations (GOCC), sama sa airport sa Mactan, angay mobayad og buhis sa lokal nga kagamhanan diin masakop ang luna nga gibarogan niini.

Apan samtang pending pa ang kaso nga gipasaka sa Lapu-Lapu didto sa Korte Suprema, giangkon sa mga tagdumala sa Mactan airport nga aduna kini tulobagong buhis sa dakbayan sa Lapu-Lapu. Ang maong buhis miabot og P1.8 bilyones.

Makausa ka higayon atong gi-Tikdolan kini’ng maong isyu nunot sa resolusyon nga gipasar sa Konseho sa dakbayan sa Lapu-Lapu nga wala makaabot sa lamesa ni Mayor Paz Radaza. Ang maong resolusyon naghatag unta og “authority” sa mayor pagdawat sa buhis gikan sa MCIA.

Apan ang Konseho ra usab ang mi-withdraw sa resolusyon sa rason nga puwerteng kamabaw – legal implication (kuno) sa authority sa mayor.

Tungod sa kahadlok nga pagatawgon sila og “supakero” ug mga “babag” sa kalamboan sa dakbayan kay mohatag na unta ang MCIA sa buhis apan wala mahinayon tungod sa pag-withdraw sa resolusyon nga naghatag og authority sa mayor, ila na usab gibakwi ang withdrawal sa authority sa mayor. Sa laktod, gi-authorize nila og balik si Mayor Paz.

Ang kuwarta’ng nahimo’ng bato nahimo na pud og kuwarta.

Giklaro man ni Villarete nga dili maka-apekto sa kaso sa Korte Suprema ang paghatag nila og buhis.

Wala hinuon kita masuheto sa kaso. Apan dili kini maoy kuwestiyon. Ang angay tan-awon mao ang benepisyo nga mahatag ngadto sa katawhan sa Lapu-Lapu tungod sa P88 milyones nga pasiunang bayad sa buhis sa MCIA.

Nindot ra ba ang plano si Mayor Paz niini’ng mao nga kuwarta gikan sa MCIA tungod kay ipatukod kini og mga classrooms. Napanglantawan sa mayor ang ka-importante sa edukasyon hinungdan nga ang ilang pamunoan mo-invest alang sa kaugmaon sa kabataan sa Lapu-Lapu.

Magamit usab kini alang sa mga programa sa turismo sa dakbayan. Adunay mga plano ang Tourism Council nga gipangulohan mismo ni Mayor Paz, ug nila’ng Konsehal Harry Radaza ug Damian “Damgo” Gomez. Nakita man sa mga taga Lapu-Lapu ang kamalampuson sa nangaging kapistahan ug Kadaugan sa Mactan. Ang Rampada sa Mactan lisod na usab hitupngan sa ubang lugar.

Karon nga aduna nay kasandigan nga pundo gikan sa buhis sa MCIA, ako nga napanglantawan nga mas molambo pa ang dakbayan sa Lapu-Lapu nga usa ka sentro sa turismo sa rehiyon siete.

* * *

Angay nato nga bantayan pag-ayo kini’ng panghadlok sa mga power players sa Cebu nga makasinati kita og rotational brownout tungod sa kakulang sa suplay sa kuryente.

Nasakpan man gud nga ang pagsaka sa presyo sa kuryente sa Meralco kon Manila Electric Cooperative mugna diay sa panagkunsabo tali kanila ug sa mga supplier sa kuryente.

Busa dili na kita magpailad pa nga pugong-pugongan ang suplay sa kuryente aron ingnon nga kulang, dayon himuon nga rason sa pagpasaka sa presyo sa kuryente aron gamiton pag-upgrade sa mga planta.

Dili na ta magpailad.