Panglawgaw sa eskandalo
Usa sa mga linya sa hiningusgang kampanya sa panglawgaw sa P10 bilyones nga pork barrel scandal, nga posibleng gipasiugdahan sa tinuod nga mga kawatan nga naglaom nga makalusot pinaagi sa pagduhig sa mga way labot apil nang mga namasangil nila, mao ni: Nganong sa kadaghan sa mga naapil sa listahan nilang Janet Lim-Napoles ug Benhur Luy, sila ra mang Juan Ponce Enrile, Jinggoy Estrada ug Bong Revilla ang gikiha og plunder?
Duha ka dili ang tubag: Una, dili ang listahan nilang Napoles ug Luy ang gipasikaran sa kasong plunder nga gisang-at ug gisusi na sa Ombudsman; ug ikaduha, dili sila rang Enrile, Estrada ug Revilla ang gikiha.
* * *
Human sa pila ka buwan nga imbestigasyon sa buhatan ni Ombudsman Conchita Carpio-Morales, napamatud-an nga may igong sukaranan ang pagpasaka sa kasong plunder ngadto sa Sandiganbayan batok sa unang hugna sa mga sinumbong sa pagbolsa sa pork barrel sa mga senador ug mga kongresista. Nakapakumbinser nilang Morales ug sa mga imbestigador sa Ombudsman pagpasaka sa kaso mao ang sangpotanan sa pagsubli sa Commission on Audit (COA) sa mga transaksiyon sa pork barrel: Nga way bisan usa ka dako nga niabot sa katawhan, nga peke ang non-government organizations (NGOs) nga nipatuman sa proyekto ug nga gibahin nilang Napoles ug sa mga opisyal sa gobyerno ang dakong kickback.
* * *
Gawas nilang Enrile, Estrada ug Revilla, gikiha sab silang Napoles, Richard Cambe, Ronald John Lim, John Raymond De Asis, Atty. Jessica Lucila “Gigi†Reyes, Ruby Tuason, Pauline Labayen ug Dennis Cunanan. May lain pang mga sinumbong nga napamatud-an na sa National Bureau of Investigation (NBI) ug Department of Justice (DOJ) nga nahilambigit sa eskandalo.
Naapil sa sunod nga pasakaan og kaso sa Ombudsman mao ang suod nga mga alyado ni Presidente Noynoy Aquino, nga naglakip nilang Ruffy Biazon (nga ni-resign na pagka customs commissioner) ug Joel Villanueva (nga nagpabilin pang direktor heneral sa Tesda).
* * *
Wa pa ipasaka ni Ombudsman Morales ang kaso batok sa unang hut-ong sa mga sinumbong kay nangayo pa og motion for reconsideration silang Enrile ug kaubanan. Kun masang-at na sa Sandiganbayan, ipadakop ang mga sinumbong ug di makapiyansa alang sa ilang temporaryong kagawasan.
Mapuslanon pagpalig-on sa mga kaso ang testimoniya nilang Luy ug ubang whistleblowers. Gawas nga nitakdo sa mga dokumento sa COA ug ubang buhatan sa gobyerno, sila’y momatuod giunsa pagmaniobra ang mga transaksiyon ug nga nadawat gyod sa mga sinumbong ang ilang bahin sa kawat.
Samang proseso ang himuon unta sa listahan ug affidavit ni Napoles. Apan tungod sa kaapurado sa tanang hingtungdan, ug tungod sa kakuwang og pagsalig sa kadaghanan sa gipasanginlang utok sa eskandalo, naahat pagpagawas nga wa pa mapaubos sa makuti nga pakisusi.
* * *
- Latest
