Problema sa drugas

Angay bitaw g’yud nga wad-on kini’ng balaod nga naglatid nga ang kapolisan kinahanglan nga mo-coordinate usa sa Philippine Drug Enforcement Agency (PDEA) kun manakop sila og drug users ug uban nga malapason sa Comprehensive Dangerous Drugs Act.

Husto si Vice Mayor Edgardo Labella nga kini’ng mao nga balaod maoy sagad gamiton sa mga abogado sa dinakpan nga drug pushers ug users aron makalingkawas sa kaso ang ilang kliyente.

Kun pananglit ang kapolisan, sa ilang pagpatrolya sa hilit nga dapit, adunay makatug-an kanila nga may nag-pot session sa usa ka payag-payag, unsaon man modagan pa sila sa PDEA aron mo-coordinate? Dili kaha ulahi na ang tanan unya?

Pananglit dakpon g’yud sa mga polis mahimo tuod nga ang abogado sa mga dinakpan mogamit sa mao nga isyu ug moingon sa hukmanan nga wala tumana sa kapolisan ang balaod nga matag operation nila mo-coordinate gayud sila sa PDEA.

Ang pagdakop sa mao nga mga tawo dili isyu kay nakakita man ang kapolisan nga nakahimo sila og salaod mao nga mahimo sila nga dakpon bisan og walay warrant of arrest.

Gilatid man kana sa Rule 113, Section 5, Rules on Criminal Procedures nga kadto’ng masakpan nga talihimo pa, naghimo na ug human sa paghimo nila sa salaod, mahimo’ng dakpon nga dili na kinahanglan ang warrant.

Apan ang pagkonbikto sa mga madakpan nga drug pushers o users nga ang kapolisan walay koordinasyon sa PDEA lahi nga isyu. Aw, hinuon, kun sa inantigo nga paagi posible nga iuwahi na lang ang koordinasyon.

Salikwaot apan tingali gihimo kini sa atong mga polis. Ang Supreme Court adunay jurisprudence nga naglatid nga ang masakmit nga mga illegal nga drugas kinahanglan nga imbentaryohon g’yud dayon didto pa sa dapit diin kini masakmit.

Gituman ba gud kini sa mga polis? Tungod niini, daghan kaayo nga mga kaso nga ang akusado naabswelto kay wala tumana sa kapolisan ang gilatid sa balaod ug sa labaw’ng hukmanan.

* * *

Nakadawat ko’g reklamo nga kana’ng karsada kilid sa Museum Sugbo, kanhi provincial jail, daghan kaayo nga sakyanan nga mo-parking nga iya sa mga drug users nga anha mamalit og drugas diha.

Ambot, pwerte lagi nga hinaya sa atong kapolisan nga manakop. Ang PDEA utro pa, nagpaalig-alig nga sila kuno ang manakop sa mga drug lords apan wala g’yud makadakop.

* * *

Wala pa gihapon kuno tagda sa mga opisyal sa Naga ang baho kaayo nga piggery sa Suba, Barangay Tuyan, Naga. Giduaw ra kuno sa taga munisipyo pero wala’y gihimo. Ang tag-iya sa piggery mao kuno si Hyde Rama.