Comelec dili friendly

Unang adlaw pa lang sa rehistrasyon sa mga botante, daw sulom nga naglaray ang daghang tawo libot sa mga dalan nga naggakos sa bilding, diin anaa mahimutang ang opisina sa Commission on Elections (COMELEC) ning dakbayan sa Sugbo.

Luoy ang nagparehistro kay puwerting buwad sa init. Maayo na lang kay wala’y senior citizen nga na-heat stroke. Igo lang gipabarog og dugay ang ilang lulid nang mga tuhod ug gipasagdang pahiton sa kaigang ang nagbitay na intawon nilang panit. Nakita kaha kini sa taga Comelec?

Ako nga nakakita sa maong kahimtang, naluoy sa mga tawo, kinsa abtik misanong sa panawagan sa COMELEC nga magparehistro’g sayo aron malikayan ang kahuot sa pagdinalidali ug pagpakiglumba sa nahabiling gutlo sa deadline date of registration. COMELEC ang nangimbitar sa katawhan. Ang katawhan nga miadto, mga bisita sa COMELEC. Busa, dapat unta nga hatagan sa COMELEC og maanindot nga akomodasiyon bugnaw nga lawak...ug dili kaigang sa makapakonsimisyon nga sistema.

Sa kadugay nang panerbisyo sa COMELEC ngadto sa katawhan, nganong maglisod man gyud kaha sila pag-andam og suwabeng proseso nga makapahayahay  sa dughan? Sa ka-advance sa teknolohiya, nganong di man gyud sila makapangita’g paagi nga malikayan ang kalangay ug maoy mopatigbabaw ang katulin?

Kaniadto, sa bag-o pa lang mibutho ang computer, may biometric registration na. Kaming taga Banawa didto ra mi parehistro sa Barangay Hall sa Guadalupe ginamit ang computer. Puwerting bugnawa sa lawak. Ang nagparehistro wa maghuot. Tanan nakalingkod. Ug dali ra ming nahuman. Pag-abot sa eleksiyon, pagbukhad didto sa listahan sa presinto, makita na akong retrato ug pirma.

Kun kining matanga sa kasayon ug kadali sa pagparehistro nahimo niadtong bata pa ang edad sa computer, unsa na kaha karon nga taas na ang mga katuigan nga iyang naagian? Di ba ang paggamit sa computer ug ubang modernong kahimanan makapapas man sa mga bulohaton? Unya, nganong di man pahimuslan sa COMELEC ang pag-usar sa gahom niini?

Ang nasinati sa katawhan sa unang adlaw sa rehistrasiyon, dili friendly. Busa, COMELEC, hangyo lang. Intawon, ubani ang kamoderno sa teknolohiya sa binag-o usab nga sistema o pamaagi. Ayg atras! Ayg balik sa kinaraan kay mosamot ta’g kadugay. Hinuon, abante pirme aron ta madali.