Aron nindot ang ngipon

Daku’g ikatabang ang atong nindot nga ngipon, di lang nga gigamit alang sa pagkaon kundi sa ekspresyon,pagpakita sa tiunay natong pahiyom. Kun atong taguon ang ngipon inig pahiyom basi’g masaypan nga nasoya o mitamiid lang kita sa atong gipahinungdan. Kay lagi mauwaw kita nga makita ang dautan nga ngipon. Busa aron mamintin ang kaanindot sa ngipon, kini ang angay buhaton:

(1)Mag-usap og sugar free nga chewing gum— May xylitol kini nga molimpyo sa ngipon ug moprodyus og daghang laway pangontra sa asido ug bacteria nga mokotkot sa ngipon.

(2)Kaon og keso (cheese)— Taas kini og calcium ug ubos ang asukar (sugar) ug asido (acid). May casein kini nga mopalig-on sa ngipon.

(3)Kaon og lab-as nga Celery (utanon) —Tungod sa iyang pagkalanuton kaonon, mausap ni’g maayo aron moprodyus og daghang laway para  maprotektahan ug malimpyohan ang ngipon batok sa ikadaut  niini.

(4)Inom og tubig sa gripo— Matud sa National Institute of Dental & Craniofacial, usa ka dibisyon sa US National Institute of Health, nga 67% sa populasyon nila didto ang nanginom sa tubig, nga may taas nga lebel sa fluoride, aron sad mahinloan nga di madunot ang ngipon.

(5)Kaon og lab-as nga Pears (prutas)— Mas maayo ni sa tanang prutas sama sa saging, mansanas, orange ug pinya, sumala sa mga pagtuon niadtong 2004. Ang pinaugang prutas nga pinahumolan sa asukar, makadaut sa ngipon kun kini maoy kanunay kaonon.

(6)Kaon o inom og Yogurt — Aduna kini casein, calcium ug phosphates, alang sa pagpalig-on, paglimpyo ug pagproteher nga di madutlan batok sa cavities ang ngipon.

(7)Paglimugmog og Sesame Oil —  ang lana sa sesame seeds maoy motabang nga di mahilis ang kasinaw (enamel) sa ngipon. Dugay na ning gihimong medesina (ayurvedic) sa mga Indian, aron pagtambal sa nanghubag nga lagos o gingivitis, nga nangahingo ang mga ngipon.