Daghan kaayo’ng karsada dinhi sa dakbayan sa Sugbo nga wala gayud atimana sa atong mga opisyal. Makasabot kita nga tingali tungod sa kanihit sa kuwarta sa City Hall mao nga pilion na lang kun hain ang ayuhon.
Ang karsada nga nagsubay kilid sa Kapitolyo paingon sa Sitio OPPRA, Capitol Site, pwerte’ng batia apan gipasagdan ra gayud sa mga tinugyanan sa City Hall.
Dili ko molalis nga gipasagdan ug wala ayoha sa City Hall ang libaongon kaayo nga karsada dapit sa karaan nga White Gold kay ang mga dagko’ng sakyanan ra man nga mag-anhaan sa mga bodega diha maoy moagi ug nakaguba sa mao’ng karsada.
Apan ang karsada paingon sa Sitio OPPRA gigamit kini sa daghan kaayo nga sakyanan, apil kadto’ng manglaktod sa ilang biyahe paingon sa Barangay Lahug.
Sa miaging semana ang City Hall nakadawat na og P607 milyones nga bahin sa dakbayan gikan sa kita sa Filinvest Land Incorporated sa halin niini pagbaligya og mga condominium units diha sa South Road Properties.
Ang mao nga kantidad angay’ng gastohon ni Mayor Michael Rama pagpatuman og mga proyekto nga kapahimuslan sa kinabag-an nga katawhan, dili kay gamiton lang pagsuborno sa mga opisyal sa barangay.
Samtang daghan nga proyekto nga wala dayon mapatuman sa administrasyon ni Mayor Rama tungod kay nihit og kuwarta ang dakbayan, apan abtik kaayo ang mayor nga mopahatag og additional honorarium sa mga opisyal sa barangay.