".... Aron kun asa ako atua usab kamo!" Kini ang nindot nga pasalig sa atong Ginoong Jesu-Kristo ngadto sa iyang mga tinun-an. Nga ang ilang pagsalo sa talad kan-anan simbolo usab sa ilang panagkuyog dili lang sa paagi nga pisikal kun dili espirituhanon usab. Kini ang kahulogan sa matag higayon nga kita motambong sa Santos nga Misa. Panahon kini diin atong gibuhi ug gi-ritualize ang atong dakong tinguha nga makig-uban sa atong Labaw'ng Pari. Panahon kini sa Pakigsalo, panahon kini sa Pakigkukabildo kaniya diha sa paagi nga katilingbanon. Human nato siya makuyog diha sa atong pagtambong sa Misa, mahinungdanon usab nga ang maong panagkuyog atong mapadayon diha sa atong inadlaw-adlaw nga pagkinabuhi. Aron ang atong nadawat gikan kaniya atong mahatag ngadto usab sa uban. Ug pinaagi sa maong pagpaambit, mas daghan ang nakaila kun unsa ug kinsa gayud ang Ginoo diha sa atong kinabuhi.